Повеќето бебиња ја подигаат главата веќе со два месеци, а ако оваа вештина ја совладаат дури на три месеци, не значи дека заостануваат во развојот. Никогаш немојте да го споредувате вашето бебе со останатите. Порано или подоцна, сите бебиња совладуваат одредени вештини. Познавањето на текот на развојот на детето служи за да навреме да се воочат одредени големи отстапувања во развојот, како и на време да се побара совет од лекар, што е многу важно за здравјето и правилен раст и развој на детето.
Прв месец – спанко
Во првиот месец, повеќето бебиња спијат 90% од времето, така што не треба да се очекуваат “сензационални“ поместувања во неговиот развој. Но, во положба на стомак, повеќето од нив, рефлексно ја вртат главата на страна, за да ги ослободат дишните патишта. Рацете и нозете се свиткани во лактовите и колената, а карлицата е дигната од подлогата поради што колената на бебето се наоѓаат под стомакот. Во положба на грб, бебето најчесто ја врти главата на десна страна. Дланките се црвсто стегнати, а кон крајот на првиот месец, повеќето на момент успеваат да ја дигнат главата од подлогата.
Втор месец – се уште спанко
Во положба на стомак, бебето успева да ја дигне главата од подлогата и така да ја задржи 10 секунди. Полека почнува да ја напушта феталната положба, така што рачињата и нозете се помалку свиткани во лактовите и во колената.
Од положба на грб, со поглед ги следи играчките во силни бои, како и лице кое се движи. Дланките се се уште затворени, но палецот веќе не е заробен, туку се наоѓаат надвор од неа. Во овој период, бебето почнува да комуницира испуштајчи звуци, најчесто – а, е и у.
Трет месец – смешко
За време на третиот месец, бебето делумно успева да го дигне градниот кош од подлогата, потпирајќи се на подлактиците. Нозете се сега речиси целосно испружени, а колената благо свиткани кон стомакот.
На положба на грб, главата ја врти на една и на друга страна, весело реагира кога ќе види играчка во силна боја и ги пружа рачињата кон неа. Дланките не се затворени, а се јавува и првата насмевка.
