Бебињата плачат, може да се каже дека тоа е нивна работа, поточно единствен начин на комуникација. Но, што ако бебето плаче премногу, дали тоа значи дека може да биде разгалено и дека треба да го оставите да плаче? Ни случајно!
Првото нешто што треба да знаете е дека реагирањето на плачењето на вашето бебе на никаков начин не е знак на слабост, ниту пак го разгалува вашето бебе, иако тоа може да ви го каже околината. Напротив, обидот да го утешите вашето бебе кога плаче всушност придонесува за неговиот емоционален и психолошки развој, како што покажале и бројни студии.
Што ќе се случи ако оставите дете да плаче?
Иако оние околу вас може да ви кажат дека ова е добар начин да го „челичите“ вашето дете, таквото однесување има последици на развојот на бебето. Имено, кога е оставено да плаче, телото на бебето е преплавено со хормони на стрес, а шефот на одделот за психосоматска медицина во Детската универзитетска болница во Минхен, д-р Карл Хајнрих Бриш, истакнува дека како резултат на тоа, во мозокот на бебето се развива „план за итни случаи“, што е нешто слично на реакција на животните кои во момент на опасност се преправаат дека се мртви, па го вкочануваат своето тели за да се заштитат и преживеат.
Последиците за бебињата можат да бидат и моментални и долгорочни:
- Нарушувања на централниот нервен систем
- Тешкотии во учењето
- Проблеми во градењето емоционални врски
- Зголемен ризик од развој на анксиозност и депресија во зрелоста
Научните студии спроведени на оваа тема утврдиле дека ако родителите редовно одговараат на потребите на детето, односно реагираат на неговиот плач, тие всушност ќе плачат многу помалку во споредба со бебињата на кои им се посветува помалку внимание од мама и тато.
Психологот и психотерапевт Розана Мартин истакнува дека „обезбедувањето сигурна основа е дефинитивно еден од најважните аспекти на родителството“.
Со други зборови, клучно за развојот на детето е родителот да биде достапен и подготвен да „интервенира“ за бебето да се чувствува безбедно.
Оставање на бебето да заспие плачејќи
Поради сите овие причини, не е паметно да оставите бебе да се успие само со плачење, иако некои нестручни луѓе може да ви кажат дека така мора и „така и нас ни правеле, па што нам ни фали?“.
Сепак, директорот на Институтот за детска педагогија, д-р Фабијан Бекер-Стол, истакнува дека на децата им е потребна физичка близина и контакт за да ги задоволат основните психолошки потреби и да го намалат стресот. Само преку контакт можат да изградат силна врска со своите родители, а потоа и со светот околу нив.
