Во 90-тите, родителите често знаеле да ги однесат децата кои сè уште не прележале сипаници кај оние деца кои се заразени и се заразни во тој момент. Постојат и студии кои докажуваат дека доенчињата кои растат во домови со домашни миленици (и целото нивно крзно) имаат помали шанси да развијат алергии. Но, денес се вакцинираме и често ги миеме рацете. Според тоа, дали изложувањето на бебињата на бактерии и вируси е добро или лошо за развојот на нивниот имунитет? Ова прашање е актуелно меѓу родителите уште од памтивек.
Како функционира имунитетот?
Дали бебињата треба да се разболат за да го зајакнат својот имунитет? Во светот на медицината ова всушност се нарекува хигиенска хипотеза, а се заснова на тоа дека изложеноста на вируси и бактерии во детството всушност помага во развојот на имуниот систем на бебето.
“Ова е тешко прашање, бидејќи е вистина – изложеноста на вируси и бактерии го стимулира нашиот имун систем“, вели Рандолф Торнтон, педијатар во Jacksonville Pediatrics и Wolfson Children’s Hospital.
“Како родител, никогаш намерно не би го изложил моето дете на вирус, но секојдневното изложување на вируси и бактерии е добро. Ако болеста не е опасна по живот, можеме да му дозволиме на имуниот систем да се справи со неа и да се зајакне во процесот“.
Дали треба да го изложам моето бебе на бактерии и вируси?
Значи, дали имунитетот се зајакнува ако го изложите детето на бактерии и вируси? Да. Но, дали треба намерно да го однесете вашето бебе кај болни луѓе? Дефинитивно не, сметаат експертите.
Од ден во ден, од одење во градинка или играње надвор, децата се изложени на многу бактерии и вируси, а до 3-годишна возраст децата во просек имаат од осум до десет настинки во текот на годината.
Иако не се препорачува намерно изложување на бебето во средина каде што има болни луѓе, кај децата кои се во групи, прашање на време е кога ќе дојдат во контакт со вируси и бактерии.
“Ако бебето е помладо од 2 месеци, им препорачувам на родителите да се држат настрана од болни деца и да не ги носат во толпа луѓе. Ова е најризичната возраст“, советува педијатарот Торнтон. “На родителите на новороденчињата не им препорачувам посети од болни луѓе и би било добро да ги мијат рацете пред да го држат новороденчето“.
Понатаму, педијатрите сметаат дека престојот во колектив, како што се градинките, се препорачува за деца над една година и дека не треба да се избегнуваат поради страв од можни болести. Децата што не одат во градинка ќе бидат поболежливи во основно училиште од оние што оделе во градинка.
Како можете да го зајакнете имуниот систем на вашето бебе?
Овие правила се секогаш важни: разновидна исхрана, доволно сон, престој на свеж воздух и движење. Значи, експертите не препорачуваат намерно изложување на децата на инфекции, важно е да се трудите да живеете здраво и да се справите со настинките веднаш штом ќе се појават.
