Пандемијата на коронавирус очекувано го зголеми и бројот на теоретичари на заговор, но има и такви на кои моменталната состојба им помогна да сфатат колку теориите кои не се базирани на наука може да бидат опасни за нивниот живот и животот на нивните најмили. Меѓу нив има и противници на вакцинирањето, т.н. антиваксери, кои сметаат дека вакцините можат да предизвикаат тешки болести, како што е аутизмот. Групата, во принцип, го задржа таквиот став и во моментите кога е повеќе од нужна вакцината во борбата против коронавирусот.
Си-Ен-Ен разговараше со луѓе кои добар период од својот живот ги бранеле своите антиваксерски ставови, а кои поради пандемијата на коронавирус, го промениле своето мислење. Меѓу нив е и Хејли Серси, 26-годишна девојка од Флорида, која вели дека била голем противник на вакцинацијата уште во 2019 година кога ја родила својата ќерка.
„Сум видела многу примери на деца кои починале од SIDS (синдром на ненадејна смрт кај новороденчиња) и уште многу примери на различни лоши физички реакции како последица на вакцинирањето. Бев подеднакво исплашена од вакцините колку што се плашев и од болестите од кои треба да штитат“, раскажува Серси.
Таа вели дека откако педијатарот на нејзината ќерка ја советувал да ја вакцинира, таа дозволила нејзината ќерка да биде вакцинирана, но сепак, се сомневала дека вакцините се непотребни и опасни. Она што го сменило нејзиниот поглед на работите е епидемијата на коронавирус. „Во текот на оваа пандемија видов што можат да направат ваквите заболувања кога не се борите против нив со вакцини“, вели Хејли, која понатаму објаснува зошто се премислила.
Ова е важно време да се разбере важноста на вакцинацијата. Да имавме вакцина против коронавирус, немаше да бидеме затворени во собите, економиите не би пропаѓале, ќе имавме еден сосема подруг свет. Прашањето кое јас би го поставила е дали мора да чекаме работите да бидат волку лоши за тоа да го сфатиме?
„Мајка ми има проблеми со белите дробови и ако она се инфицира со Ковид-19, нема да може да се бори. Научив колку што можев да зборувам против дезинформациите со надеж дека можам да убедам повеќе луѓе да останат дома и да ги следат препораките за социјално дистанцирање за мајка ми да не се разболи. Толку многу животи се загрозени вклучувајќи ги и луѓето кои ми се драги, а се многу ранливи.“
Во процесот на истражување како светот се справувал со пандемиите во минатото, Серси научила дека неодамнешните пандемии како онаа на свински грип биле победени со вакцини. „Исто така разбрав и колку се ригорозни тестирањата на вакцините пред тие да бидат достапни во јавноста. Не барав активно информации за вакцини, но колку повеќе учев за тоа, толку повеќе сфаќав дека би помогнале, а и полесно беше да го препознаам недостаток на наука во антиваксерските аргументи“, изјави таа.
Антиваксерите се се уште тука, но пандемијата не е добар момент да се покажат
Исак Линденбергер, 23-годишник од Охајо, има мајка која остро се спротивставува на вакцинацијата, а неговиот помал брат Итан стана тема минатата година, кога реши да се вакцинира на 19-годишна возраст и покрај молбите на мајка си да не го прави тоа. Исак не размислувал премногу за вакцинирање се дотогаш, кога почнал да истражува и се вакцинирал пред шест месеци, кога морал да го стори истото, бидејќи тоа бил еден од условите за упис на Државниот колеџ во Охајо. Денес, тој има подкаст што има за цел на емпатичен начин да ги спречи дезинформациите на јавноста за прашања како овие.
„Дефинитивно гледам позитивен ефект кај антиваксерите, кои порано не ни помислувале на вакцинирање“, изјави тој за Си-ен-ен. „Многу е потешко е да се негираат научните факти кога се соочувате со пандемија. Антиваксерите се се уште тука. Но не се покажуваат бидејќи во време на пандемија на инфективна болест е веројатно погрешен момент да се обидат да ги спречат превентивните мерки“, смета Исак.
Сегашната состојба ги провоцира луѓето добро да размислат
Дека мислењето на јавноста почна да се менува, исто така, сугерира и истражувањето на Vaccine Confidence Project (VCP), Проект за доверба во вакцините, на истражувачка група од Лондонскиот институт за хигиена и тропски болести.
Имено, според нивното истражување, како што расте бројот на смртни случаи од коронавирус, и сфаќањето за сериозноста на проблемот во јавноста – расте, луѓето се повеќе ја прифаќаат идејата за вакцинирање.
„Мислам дека сегашната состојба дефинитивно ги провоцира луѓето добро да размислат за многу работи“, изјави директорката на VCP, Хајди Ларсон, напоменувајќи дека, сепак, се потребни повеќе податоци за да се добие конечната слика. Ларсон вели дека „некои луѓе одат на спротивната страна“ и немаат доверба во потенцијалната Ковид-19 вакцина.
„Ова е важно време да се разбере важноста на вакцинацијата. Да имавме вакцина против коронавирус, немаше да бидеме затворени во собите, економиите не би пропаѓале, ќе имавме еден сосема подруг свет. Прашањето кое јас би го поставила е дали мора да чекаме работите да бидат волку лоши за тоа да го сфатиме?“
„Кога вакцините ќе станат широко распространети и луѓето нема да гледаат закана, тогаш стануваат поскептични“, вели Ларсон, која додава дека заштитата на општеството „тотално зависи од соработката на јавноста.“ (Си-ен-ен)
