„Случаите кои досега се откриени во Јужна Африка не се сериозни“, изјави за Би-Би-Си д-р Анџелик Коци, која претседава со Јужноафриканската медицинска асоцијација, за новата варијанта на коронавирус – омикрон.
Сепак, истражувањето на омикрон се уште е во многу рана фаза, рече таа, додавајќи дека само 24 отсто од луѓето во земјава се целосно вакцинирани.
„Пациентите најмногу се жалат на болки во телото и замор, екстремен замор и тоа го гледаме кај помладата генерација, а не кај постарите луѓе“, рече таа. Тоа не се пациенти кои се примени во болница, објасни д-р Коци.
- Во коментари за другите медиуми, д-р Коци изразува загриженост за влијанието што варијантата би можела да го има врз постарите луѓе со основни болести како што се срцеви заболувања или дијабетес
„Симптомите на новата варијанта се невообичаени, но благи“, рече таа, додавајќи дека прво била предупредена за можноста за нова варијанта кога пациентите со невообичаени симптоми за Ковид-19 дошле во нејзината канцеларија во Преторија на почетокот на ноември, жалејќи се на силен замор.
„Она за што сега треба да се грижиме е дека кога постарите, невакцинирани луѓе ќе се заразат со новата варијанта, и ако не се вакцинирани, ќе видиме многу луѓе со тешка форма на болеста“, изјави таа за „Телеграф“.
Кои се најчестите симптоми на омикрон
Д-р Коци, која исто така е член на Министерскиот советодавен комитет за вакцини, рече дека за разлика од делта сојот пациентите досега не пријавиле губење на мирис или вкус и немало голем пад на нивото на кислород со новата варијанта.
Нејзиното досегашно искуство е дека оваа варијанта ги погодува луѓето кои имаат околу 40 години или помлади. Речиси половина од пациентите со симптоми на омикрон кои таа ги третирала не биле вакцинирани.
„Најчеста клиничка тегоба е силен замор кој трае еден или два дена. Заедно со него, се јавува и главоболката и болки во телото“, објаснува д-р Коци.
Според пишувањата на повеќето медиуми Коци е првата јужноафриканска лекарка која на 18 ноември ги предупредила властите за пациентите со новата варијанта на коронавирус.
Омикрон е класифициран од Светската здравствена организација (СЗО) како „загрижувачка варијанта“, додека Европскиот центар за контрола на болести изрази сериозна загриженост дека новата варијанта би можела значително да ја намали ефикасноста на достапните вакцини и да го зголеми ризикот од повторна инфекција.
Како одговор на оваа вест, многу влади ширум светот ги прекинаа патничките летови од некои јужноафрикански земји, вклучувајќи ги Боцвана, Лесото, Мозамбик, Намибија, Зимбабве, Јужна Африка и Свазиленд.
