Кај сите деца примени во болница минатата недела, се забележува дека дошло до штетни последици за срцевиот мускул, затоа добиваат силни антиинфламаторни лекови, а во лекувањето покрај педијатрите се вклучени и кардиолозите и ревматолозите
Иако децата ја минуваат инфекцијата со коронавирус претежно со благи симптоми или без нив, тие поради силната имунолошка реакција можат да претрпат оштетување на повеќе органи, вклучително и на срцето, предупредија вчера словенечките лекари, кои во последните денови се сретнале со повеќе такви случаи.
Како што истакна на прес конференција педијатарот Тина Планкар-Сровин од Универзитетскиот медицински центар-Љубљана, минатата недела во најголемата словенечка здравствена установа биле примени шест деца кои имале воспаление на повеќе органи.
Според лекарите, тоа било резултат на силната имунолошка реакција на нивниот организам откако биле заразени со коронавирус две до четири недели претходно, а потоа и го преболеле.
„COVID-19 кај децата се одвива во полесна форма, но болеста може да има сериозни последици“, предупреди таа.
Повеќе случаи на заразени деца со воспаление на повеќе органи
Досега во болницата имале 40 деца заболени од COVID-19, а во последната недела забележале повеќе случаи на деца со „мултиоргански воспалителен синдром“, поврзан со првичната инфекција со коронавирус.
Кај сите деца примени во болница минатата недела со овие симптоми, се забележува дека дошло до штетни последици за срцевиот мускул, затоа добиваат силни антиинфламаторни лекови, а во лекувањето покрај педијатрите се вклучени и кардиолозите и ревматолозите.
Словенечките педијатри напоменуваат дека појавата на слични симптоми кај деца заболени од COVID-19 прв пат е забележана во Велика Британија пред повеќе месеци.
Во првиот бран заразени само четири деца, сега над 40
Од Универзитетскиот медицински центар (УМЦ) во Љубљана потврдуваат дека во првиот епидемиски бран имале само четири деца заразени со COVID-29 на лекување, но се работело за поблаги случаи, додека во есенскиот втор епидемиски бран досега во болницата се лекувани 43 деца.
Но, кај постари бебиња и помлади деца кај кои се појавила инфекција со коронавирус, во последно време се забележуваат и инфекции на долните респираторни органи и отежнато дишење, а покрај тоа кај нив се потврдени и некои други вируси.
Тежок облик на COVID-19 кај две деца
Две деца, и двете со претходно потврдена основна болест, се разболеле од тежок облик на COVID-19, но на ниту едно од нив не му бил потребен респиратор, објавија од УМЦ-Љубљана.
На тамошната Клиника за детски болести, меѓутоа се лекуваат и три новороденчиња со COVID-19, кај кои болеста покажувала „клиничка слика на сепса“, а две од нив претходно биле лекувани на одделот за интензивна нега.
