Во низата на не така добри вести поврзни за новиот коронавирус, има и светло на крајот од тунелот. Тоа го потврдува најнова студија според која смртноста на одделите за интензивна нега е намалена за една третина од почетокот на пандемијата со КОВИД-19.
Научниците од Универзитетот во Бристол прегледале 24 меѓународни истражувања во кои учествувале 10.000 пациенти и утврдиле дека смрноста е намалена за една третина во периодот од март до крајот на мај. Се претпоставува дека лекувањето е се подобро, односно дека искуството на лекарите добило на квалитет, а тоа и ја намалило стапката на смртност.
Професорите веруваат дека исходите од лекувањето на пациенти со тешка форма на болеста КОВИД-19 дополнително ќе се подобри и откако се утврди дека евтин стероиден лек има докажан противвоспалителен ефект кај болните. Податоците говорат дека тој лек го намалува ризикот од смрт на пациент кој е на респиратор за дури 35%, а кај оние кои се на кислородна поддршка за една петина.
Само мал број научници веруваат дека всушност вирусот е ослабен и дека тоа може да е причината за се поголемиот процент на преживување кај тешките пациенти. Вистина е дека вирусите со тек на времето се менуваат поради генетските митации, но засега нема докази дека тоа се случува и со новиот коронавирус. Треба да се спомене и дека кога вирусите стануваат помалку опасни за човекот, тие тогаш имаат и помалку симптоми и помала смртност, но се во состојба подолго да живеат и повеќе да се репродуцираат. Но, се уште нема докази дека тоа се случува и со коронавирусот.
Научниците се се поблиску до толкувањето дека лекарите се подобро може да проценат кога некој пациент е потребно да се стави на респиратор и како со лекови и во која доза да ги намалат симптомите на КОВИД-19.
Главниот автор на студијата, Том Кук вели дека стапката на смрност од коронавирусот и натаму ќе се намалува како на лекарите им стануваат достапни нови ефикасни лекови.
