Некаде на половина од летото, ентузијазмот почнува да попушта и бројни родители ги стига реалноста. Улогата на „организатор на патувања“, задолжен за креирање распоред полн со активности, излети и семејни авантури, станува исцрпувачка и едноставно сте уморни.
Семејниот терапевт Шиобан Чирико открива дека родителите чувствуваат поинаков вид притисок во текот на летото отколку во остатокот од годината. Иако сакаат да го искористат максимално своето слободно време за време на одморите или патувањата, тие често завршуваат под стрес, исцрпени и одвоени од децата за кои толку многу се трудат да уживаат. Вистината е дека на вашите деца не им треба повеќе забава ова лето – им требате повеќе вие.
Таа издвојува пет едноставни, но значајни промени што можат да го претворат остатокот од летото во сезона на поврзување, мир и раст и за вас и за вашите деца.
Поврзаност пред контрола
Летото е совршено време за повторно поврзување, не само со рутина. Забавете го темпото и посветете се еден на друг. Ослободете се од потребата да планирате секој момент. Играјте друштвени игри. Прошетајте. Уживајте во заеднички лежерен појадок. „Вистинската поврзаност не доаѓа од тоа да правите повеќе, туку од тоа да бидете присутни“, вели Чирико.
Структура со флексибилност
Децата најдобро функционираат кога знаат што да очекуваат, но тоа не значи дека секој ден мора да биде испланиран до последен момент. За да го смирите нивниот мал нервен систем, користете визуелни потсетници. Обидете се да создадете голем семеен календар и да го закачите на видливо место.
Запишете ги претстојните настани за вашите деца да знаат што да очекуваат. „Календарот може да помогне во ублажување на чувството на неизвесност и важно е да се запомни дека „денот дома“ е одлична опција“, вели таа. Клучот е само да ги известите вашите деца за да можат ментално да се подготват.
Дозволете досадата да си го направи своето
„Досадно ми е“ – ако оваа реченица ве тера да воздивнете, не сте сами. Но, досадата не е проблем што треба да се реши, туку покана за креативност. Кога се повлекуваме наместо да нудиме непосредни решенија, децата почнуваат да истражуваат, измислуваат и откриваат. Некои од најбогатите имагинативни игри се раѓаат токму од досадата, каде што цветаат имагинацијата и креативноста.
Поддршка во регулирањето на емоциите
Летото носи нови рутини или нивно целосно отсуство. Патувањата, промените во времето за спиење и посетите од различни луѓе можат да бидат дестабилизирачки за децата. Помогнете му на вашето дете да препознае како се чувствува.
Користете реченици како: „Се чини дека телото кажува дека му е потребна пауза“ или „Се прашувам дали се чувствуваш преоптоварено“. Емоционалната писменост започнува со забележување, именување и нормализирање на чувствата.
Прво смирете се себеси
Кога детето доживува емоционален слом, вашата смиреност е неговото сидро. Вдишете длабоко пред да реагирате. Прашајте се: Што му треба на моето дете од мене токму сега? Кога одговараме со мирно присуство наместо со насилна реакција, ги учиме децата дека силните чувства се нешто што може да се управува и не се опасни.
