Клучни точки:
◊ Како родител, вие давате добар почеток на животот на вашите деца – ги негувате, заштитувате и водите;
◊ Научете за развојните достигнувања, вклучително емоционалниот и социјалниот развој на бебињата од раѓање до една година;
◊ Постојат многу нешта што можете да ги направите за да му помогнете на вашето бебе да остане безбедно и здраво.
РАЗВОЈНИ ДОСТИГНУВАЊА
Вештините како што се правењето на првиот чекор, првата насмевка и мавтањето за „чао“ се нарекуваат развојни достигнувања (пресвртници). Повеќето деца ги постигнуваат овие достигнувања до одредена возраст. Децата достигнуваат пресвртници во тоа како си играат, учат, зборуваат, се однесуваат и движат (како што се лазење, одење или скокање).
Во првата година, бебињата учат да го фокусираат видот, да посегнуваат, да истражуваат и учат за работите кои ги опкружуваат. Когнитивниот развој или развојот на мозокот, го опфаќа процесот на учење поврзан со меморија, јазик, размислување и расудување. Учењето на јазикот е повеќе од само правење звуци (брборење) или кажување „ма-ма“ и „да-да“. Слушањето, разбирањето и познавањето на имињата на луѓето и работите се дел од развојот на јазикот.
Во текот на оваа фаза, бебињата формираат врски на љубов и доверба со своите родители и други лица, што го обликува нивниот социјален и емоционален развој. Начинот на кој родителите ги прегрнуваат, држат и си играат со своето бебе ќе ја постави основата за идните интеракции со нив и со другите.
Совети за позитивно родителство
Во текот на оваа фаза, бебињата формираат врски на љубов и доверба со своите родители и други лица, што го обликува нивниот социјален и емоционален развој. Начинот на кој родителите ги прегрнуваат, држат и си играат со своето бебе ќе ја постави основата за идните интеракции со нив и со другите
Еве неколку работи што можете да ги направите како родител за да му помогнете на вашето бебе во овој период:
- Разговарајте со вашето бебе – за него вашиот глас делува смирувачки.
- Одговарајте кога вашето бебе прави звуци повторувајќи ги звуците и додавајќи зборови. Ова ќе им помогне да научат како да го користат јазикот.
- Читајте му на вашето бебе – ова ќе му помогне да го развие и разбере јазикот и звуците.
- Пејте му и пуштајте му музика – така ќе ја засака музиката, а тоа ќе му помогне и во развојот на мозокот.
- Пофалете го и пружајте му многу љубов и внимание.
- Поминете време прегрнувајќи го и држејќи го бебето – ова ќе му помогне да се чувствува згрижено и сигурно.
- Играјте со бебето кога е будно и смирено. Следете ги знаците на умор или раздразливост за да може да се одмори од играта.
- Одвлечете му го вниманието со играчки и преместете го на безбедни места кога ќе почне да се движи и да допира нешта што не треба.
ПОГРИЖЕТЕ СЕ ЗА СЕБЕ ФИЗИЧКИ, МЕНТАЛНО И ЕМОЦИОНАЛНО. Родителството може да биде напорно! Полесно е да уживате со вашето новороденче и да бидете позитивен родител полн со љубов кога и вие се чувствувате добро
Безбедност на детето пред сè
Кога бебето ќе стане дел од вашето семејство, време е да се уверите дека вашиот дом е безбедно место. Погледнете го вашиот дом и проверете дали има работи што би можеле да бидат опасни за вашето бебе. Преземете ги потребните мерки за да бидете ментално и емоционално подготвени за новото бебе. Еве неколку совети за да го зачувате вашето бебе безбедно:
- Никогаш не тресете го вашето бебе!!! Бебињата имаат многу слаби мускули на вратот кои не можат се уште да ја поддржат главата. Тресењето може да го оштети мозокот или дури да доведе до смрт.
- Секогаш ставајте го бебето да спие на грб за да го спречите синдромот на ненадејна смрт кај новороденчиња (SIDS).
- Заштитете го бебето и семејството од пасивно пушење. Не дозволувајте никој да пуши во вашиот дом.
- Спречете го бебето да се загуши со тоа што ситно ќе ја исечкате храната на мали парчиња. Исто така, не дозволувајте да си игра со мали играчки што лесно би можело да ги голтне.
- Не дозволувајте му на бебето да си игра со нешто што би можело да му го покрие лицето.
- Никогаш не носете топли течности или храна во близина на вашето бебе или додека го држите.
- Вакцините се важни за заштита на здравјето на вашето дете од сериозни болести. Разговарајте со лекарот на вашето дете за да бидете сигурни дека детето е редовно вакцинирано.
ПРЕПОРАКИ ЗА АВТОМОБИЛСКО СЕДИШТЕ ЗА ДЕЦА. Ставете го вашето бебе во автомобилско седиште свртено наназад, на задното седиште на автомобилот додека патувате. Ова го препорачува Националната управа за безбедност на сообраќајот на патиштата (National Highway Traffic Safety Administration)
Здраво тело
Доењето е природен начин на хранење на бебето. Мајчиното млеко ги задоволува сите потреби на вашето бебе во првите шест месеци. Од шест до дванаесет месеци, бебето ќе учи за нови вкусови и текстури со здрава цврста храна, но мајчиното млеко и понатаму треба да биде важен извор на исхрана.
- Хранете го бебето бавно и со трпение, охрабрувајте го да пробува нови вкусови, но без присила, и внимавајте дали е уште гладно.
- Одржувајте го бебето активно – тие можеби не можат да трчаат и играат како „големите деца,“ но има многу нешта што можат да ги прават за да ги движат своите раце и нозе во текот на денот.
- Спуштањето на подот да се движи му помага на вашето бебе да стане посилно, да учи и да истражува.
- Обидете се да не го оставате премногу долго во лулашки, колички, седишта за скокање и играчки за вежбање.
- Ограничете го времето пред екранот. За деца под 18 месеци, Американската академија за педијатрија препорачува да не користат екран, освен за видеоповици.
- Осигурете се дека вашето дете ја добива препорачаната количина на сон секоја ноќ: за доенчиња од 4 до 12 месеци, потребни се 12–16 часа во 24 часа (вклучувајќи ги и дремките).
Следно: СОВЕТИ ЗА ПОЗИТИВНО РОДИТЕЛСТВО: Мали деца (1-2 години)(Извор: Американски центар за контрола и превенција на болести – ЦДЦ)
