Многу трудници и млади мајки се загрижени дека нема да можат успешно да дојат поради малите гради. Дали големината на градите воопшто влијае на доењето и успехот на совладување на техниката?
Големината на градите се одредува според количината на масно ткиво, па затоа големината на градите не е поврзана со способноста за производство на млеко и доење. Експертите се согласуваат дека големината на градите не е пресудна.
Барбара Финдерле, акушерка и консултант за доење на IBCLC, објаснува: „Помалите гради се помали бидејќи имаат помалку масно ткиво, но имаат приближно иста количина на млечни жлезди. Жените со помали гради имаат помал капацитет да складираат млеко и понекогаш ќе треба повеќе да дојат. Меѓутоа, млекото континуирано се произведува и тоа е процес на „понуда и побарувачка“. Колку повеќе детето цица, толку повеќе млеко ќе се произведува. Се зависи од потребите на детето“.
Повеќето жени со мали гради во одреден момент си го поставиле прашањето: „Дали ќе можам да го дојам своето дете?“
Важна е техниката, а не големината
За доењето, важно е ткивото кое произведува и складира млеко за да го нахрани бебето, а не мастите. Веројатно на самиот почеток на бременоста, од шестата до осмата недела, ќе забележите дека вашите гради стануваат се поголеми и потешки. Како што се приближува терминот за породување на вашето бебе, тоа ќе биде се позабележително, дури може да забележите дека млекото веќе капе од вашите гради. Првата течност што се создава во градите по раѓањето се нарекува колострум и тоа е првото наоружување на одбранбениот систем на детето. „Според Светската здравствена организација, дури 99% од мајките можат да ги дојат своите новороденчиња, прашање е само колку се свесни и упорни, и колку околината се меша во процесот на воспоставување на доење во првите неколку дена по породувањето“, вели Барбара Финдерле.
Исклучително е важно идната мајка да се запознае со придобивките од доењето и техниките уште за време на бременоста. Соодветната поддршка од здравствените работници и советниците за доење во текот на бременоста, веднаш по породувањето, но и подоцна, помага да се решат што поуспешно почетните проблеми со доењето. Многу мал број жени нема да можат да дојат поради некоја вистинска причина. Повеќето од нив се откажуваат затоа што се уморни, мислат дека не можат тоа да го прават, дека бебето е гладно или дека имаат мали гради или вовлечени брадавици. Не треба да се грижите за големината на вашите гради, туку треба да бидете добро едуцирани и да знаете каде да побарате помош, доколку е потребно.
Жените со поголеми гради имаат и поголеми проблеми
Во реалноста жените со поголеми гради имаат повеќе проблеми. На почетокот, бебињата може да имаат проблеми со прифаќање на големи гради и појасот околу брадавицата – ареолата – затоа што имаат мали усти кои мора да прифатат голема дојка. По околу еден месец, кога мама и бебето се во хармонија, таквите проблеми исчезнуваат. „Во пракса често се случува жените со поголеми гради да имаат повеќе проблеми во првите денови од доењето, па затоа нема потреба да се грижите за големината на градите“, коментира советничката за доење.
Најдобро решение е да се дои по потреба
Мајчиното млеко постојано се произведува и се складира во млечните канали помеѓу доењето. За време на хранењето, бебето обично испразнува околу 70-80% од млекото во градите. Едно истражување покажало дека некои жени имаат три пати поголем капацитет за складирање од другите, но во рок од 24 часа сите жени произведуваат иста количина млеко. Поголемите гради имаат поголем капацитет за складирање, но понекогаш тоа и не е добар показател. Без разлика дали имате мали гради со голем капацитет за складирање или големи гради со мал капацитет за складирање, решението е да доите по потреба односно на барање на бебето. Така ќе бидете сигурни дека вашето дете е среќно.
Барбара Финдерле дава и кратки совети за тоа како да се подготвите:
- соодветна едукација на идните мајки
- најдете советник за доење во својот реон
- обидете се да обезбедите природно породување без интервенции и лекови
- дозволете си најмалку еден час контакт кожа со кожа веднаш по раѓањето
- погрижете се вашето дете да е со вас 24 часа на ден во првите денови од животот (неопходно е да имате обезбеден rooming-in во родилиштето)
- обидете се да избегате од стресот и проблемите
- вие се грижите само за детето, а сите останати работи обидете се да ги оставите на другите. (Мис Мама)
