Растењето и воспитувањето деца може да бара многу. Затоа, не е невообичаено да се видат уморни родители кои мислат дека повеќе не можат да се справат со предизвиците на родителството. Според неврологот д-р Пуја Агарвал, родителското прегорување или т.н. брнаут, е „физичка, ментална и емоционална исцрпеност што родителите ја чувствуваат поради хроничниот стрес од родителството“.
Со оглед на модерниот, брз начин на живот кој ги принудува родителите да извршуваат повеќе задачи за помалку време, прегорувањето може да биде очекувано. Меѓутоа, за родителите да ја побараат потребната помош, најпрво е важно да се препознаат симптомите на родителското согорување.
Психологот Џејми Блох, открива кои се петте најчести знаци на овој синдром.
Упорна исцрпеност: Постојано чувство на замор што не се подобрува дури и по одмор. Може да се чувствувате исцрпени, да немате енергија и да имате потешкотии да ги исполните родителските обврски.
Емоционална одвоеност: Емоционално повлекување од саканите и потешкотии при вклучување во семејни активности.
Зголемена раздразливост и фрустрација: Посилни реакции на мали нешта или секојдневни чувства на преоптоварување.
Чувство преоптовареност со рутински задачи: Потешкотии со доследност во дисциплината, организацијата или одржувањето на структуриран распоред.
Физички симптоми: Хроничниот стрес поврзан со исцрпеност може да се манифестира со физички симптоми како што се главоболки, дигестивни проблеми или проблеми со спиењето.
„Првиот чекор во справувањето со исцрпеноста е да се препознае и да се признае. Прифатете дека е во ред да се чувствувате преоптоварени и дека барањето помош не е знак на слабост, туку на сила“, вели психологот.
Согорувањето на родителите е проблем кој не треба да се игнорира. Според Блох, малите промени како што се грижата за себе, поставувањето граници, одморот и разговорот со саканите можат значително да ги олеснат овие предизвици.
