Американското здружение на психолози ги објави резултатите од најновото истражување според кое децата чии мајки доживеале голем стрес, анксиозност и депресија за време на бременоста почесто развиваат некое ментално нарушување во текот на раното детство и во тинејџерскиот период. Резултатите од истражувањето, покажале дека децата на мајки кои во бременоста доживеале стресни, анксиозни и депресивни епизоди, во текот на детството покажале симптоми на нарушување на вниманието (АДХД), но и агресивно, дезинхибирано и импулсивно однесување кон родителите и наставниците.
„Нашето истражување само го потврдува фактот дека на жените за време на бременоста им е потребна поддршка и за нивното ментално здравје, бидејќи тоа е клучно за превенција од бихевиорални проблеми во текот на детството“, истакнала д-р Ирене Тунг.
Проблематичното однесување се манифестира од втората до 18. година, иако симптомите најсилно се забележани во раното детство, подеднакво кај девојчињата и момчињата, од втората до петта година.
