Две дози на вакцината на Фајзер/Бионтек или АстраЗенека пружаат слично ниво на заштита од Ковид-19 како и природниот имунитет развиен по инфекција со коронавирус, покажува новата студија.
Ниту еден од 1.456 здравствени работници во ланецот на британски болници на Универзитетот во Оксфорд, кои ги примиле обете дози на вакцината, немал симптоматска инфекција откако поминале 14 дена од примањето на втората доза на вакцината.
Студијата покажала исто ниво на заштита кај невакцинирани здравствени работници кои прележале Ковид-19. Тие имале 98 проценти помалку симптоматски инфекции во споредба со невакцинираните лица кои не биле изложени на вирусот до почетокот на студијата, според студијата.
Повеќето од здравствените работници вклучени во студијата добиле само една доза од вакцината до моментот кога започнала анализата на податоците. Според студијата, првата доза на вакцината обезбедува заштита од симптоматска инфекција од 67 проценти, а неа ја примиле 11.023 вработени во болницата.
Вкупно 13.109 здравствени работници од болничкиот ланец учествувале во студијата. Од нив 8.285 биле вакцинирани со Фајзер/Бионтек, од кои 1.407 со две дози, а 2.738 примиле вакцина на АстраЗенека, од кои 49 ја добиле втората доза.
Д-р Кети Џефери, директорка на Канцеларијата за превенција и контрола во ланецот на болници, рече дека е впечатливо тоа што двете дози на вакцината обезбедиле слично ниво на заштита, кое го дава природниот имунитет на лицето кое ја прележало болеста, и дека кај оние кои ги примале обете дози немало симптоматски инфекции.
„Податоците од ваквите истражувања се важни затоа што даваат информации што влијаат на јавната здравствена политика“.
Студијата, која нема поминато научна реценција е објавена на серверот MedRxiv.
Научниците не пронашле никакви докази дека вакцината или заштитата обезбедена од имунитетот стекнат преку болеста обезбедува помала заштита од инфекцијата со британската мутација на вирусот, пренесува „Хина“.
