Тим лекари од Клиниката за уво, нос и грло при Клиничкиот центар во Ниш, Србија истражувал какво е влијанието на КОВИД-19 на слухот и дошол до сознание дека болеста може да доведе од благ до среден пад на слухот на високи фреквенции.
Ова, вели директорот на Клиниката, д-р Душан Милисављевиќ е прва сеопфатна студија во светот за влијанието на КОВИД-19 на слухот.
Според него, стручњаците од клиниката го испитувале влијанието на новиот коронавирус врз слухот кај пациентите со средна и со тешка клиничка слика на болеста.
“Откривме благ до среден пад на слухот кај високите фреквенции. Тоа значи дека коронавирусот може да го нападне и слушниот нерв. Ги евидентиравме овие пациенти, ги упативме и понатаму да го проверуваат слухот и ги повикавме да влеземе и во втора фаза, односно да најдеме соодветна терапија за состојбата“, изјави д-р Милосављевиќ.
На основа на овие податоци, лекарот укажува дека кај одделни пациенти слухот се враќа за неколку недели, а кај некои за тоа се потребни и месеци.
Д-р Милосављевиќ наведува дека постојат две теории како коронавирусот го напаѓа и оштетува слушниот нерв.
- Првата, вели тој, е дека во крвта се создаваат микротромбови кои удираат на внатрешното уво и ја оштетуваат васкуларизацијата на слушниот нерв.
- Втората, според него, е недостаток на кислород во хемоглобинот, што го оштетува слушниот нерв.
