Светскиот ден на срцето се одбележува секоја година на 29 септември, а оваа година е под слоганот: „Користете го срцето“
Кардиоваскуларните болести се водечка причина за смртност во светот: тие се одговорни за 17,9 милиони смртни случаи годишно ширум светот, а се проценува дека до 2030 година ќе бидат причина за 23 милиони смртни случаи.
Причините за кардиоваскуларни болести се бројни – од пушење, дијабетес, висок крвен притисок, дебелина, неправилна исхрана, физичка неактивност, до загадување на воздухот. Во време на пандемијата со COVID-19, луѓето кои имаат кардиоваскуларни болести се изложени на двојна закана: имаат зголемен ризик од развој на потешка клиничка слика на болеста предизвикана од SARS-CoV-2, но исто така се плашат да побараат помош за нивните постојни кардиоваскуларни проблеми.
Не знаеме што носи пандемијата понатаму, но знаеме дека грижата за сопственото срце сега е поважна од кога било.
Светскиот ден на срцето се одбележува на 29 септември, а оваа година е под слоганот: „Користете го срцето“, со кој се покануваат сите да си ветат себеси и на сите околу нив дека ќе водат поздрав начин на живот. Мали промени во животните навики, како што се правилна исхрана, физичка активност и прекинување на пушењето, може да доведат до подобрување на здравјето на срцето.
Причините за кардиоваскуларни болести се бројни – од пушење, дијабетес, висок крвен притисок, дебелина, неправилна исхрана, физичка неактивност, до загадување на воздухот
Лекарите препорачуваат да се грижите за срцето и кога сте дома:
- Продолжете да вежбате, да јадете балансирана исхрана, наспијте се;
- Продолжете да комуницирате со другите, одржувајте ги пријателствата, контактите со семејството;
- Не читајте/слушајте премногу за пандемијата, користете само проверени извори;
- Не обидувајте се да го третирате стресот со алкохол и лекови;
- Не избегнувајте посета на вашиот лекар поради страв од инфекција, бидејќи е многу поопасно да добиете срцев или мозочен удар отколку да се заразите со COVID-19. Брзата реакција е многу важна. Посетата на лекар не треба да се одложува!
Во земјава се бележи тренд на намалување на смртноста од кардиоваскуларни заболувања
Во изминатите десетина години постои тренд на намалување на смртноста од кардиоваскуларни заболувања во земјава. „Тоа пред сѐ се должи на намалениот број на смртни случаи од исхемични болести на срцето, цереброваскуларните болести или со други зборови акутниот инфаркт на срцето и мозочниот удар. Тоа сметаме дека е резултат на долгогодишната борба да работиме повеќе на превенција на заболувањата, односно превенција на ризик факторите кои доведуваат до овие заболувања, како што се употребата на тутунот, неправилната исхрана, слабата физичка активност, голема и неконтролирана употреба на алкохолот и секако стресот“, објасни проф. д-р Елена Ќосеска од ИЈЗ на неодамнешниот настан посветен токму на Светскиот ден на срцето.
