Во првите неколку месеци од животот, бебето најмногу ќе ве изненади со звуците што ги “испушта“. Ќе се зачудите бидејќи “цмока“, кива, стенка, но и ‘рчи. Дишните патишта, кои минуваат низ нејзиниот нос, сè уште се тесни, а таму често се насобира и слуз во текот на првите денови од животот, остатоци од плодова вода.
Не грижете се, нема опасност, а еве како можете да го ублажите ‘рчењето.
Чистење на носните патишта
Можно е вашето бебе да ‘рчи поради алергија или настинка. Исчистете му ги носните шуплини со физиолошки раствор (или солена морска вода во спреј) – можеби тоа ќе помогне ‘рчењето да престане.
Топлата купка е секогаш ефикасна
За да спречите ‘рчење, прочистете ги носните патишта на бебето со топла купка, по можност навечер, пред спиење.
Корисен е и навлажнувач на воздухот
Ставете го во собата на бебето. За време на студените денови, како и ако бебето има алергија, ќе забележите намалување на зачестеноста на ‘рчењето кога користите навлажнувач.
Колку порано во кревет, толку подобро
Ставете го бебето во кревет рано. Многу бебиња ‘рчат затоа што одат на спиење дури кога се премногу уморни.
Отстранете ги алергените од вашиот дом
Различни алергени може да доведат до прекумерно производство на слуз, што предизвикува ‘рчење. Во близина на бебето не смее да има прашина, пердуви, животински влакна, одредени играчки (полнети крзнени животни), премногу пудра во воздухот за време на негата, влакна од волнени ќебиња…
Пушењето во близина на бебето е строго забрането! И тоа во голема мера може да предизвика ‘рчење.
Проверете го здравјето на бебето
Однесете го вашето бебе кај педијатар ако ‘рчењето ве загрижува. Во некои случаи, тоа може да укажува на посериозен проблем, како што е апнеја или зголемени крајници (иако тоа ретко се случува кај доенчиња).
Објаснете му на докторот детално како изгледа кога бебето ‘рчи (можете да го снимате и со мобилен телефон или камера), како и дали се мачи да дојде до здив.
Подалеку од заразени
За да избегнете чести настинки кај бебето, а со самото тоа и ‘рчење, држете го подалеку од други настинати деца, како и од било кое возрасно лице ако се сомневате дека има некоја респираторна инфекција.
