Во Америка има 700.000 смртни случаи од Ковид-19, а за жал тоа не е крај бидејќи и понатаму не демне делта сојот, кој многу полесно се шири, а најмногу може да им наштети на луѓето кои не се вакцинирани. Загрижен дека ќе следуваат уште повеќе смртни случаи, д-р Ентони Фаучи, главен советник на американскиот претседател и директор на Центарот за заразни болести, во интервју за „This Week“ на ABC, открива три важни предупредувања кои секој треба да ги прочита.
1. Делта сојот е исклучително застрашувачки вирус
Д-р Фаучи истакнува дека се работи за многу застрашувачки вирус уште од самиот почеток. „Тој се разви до тој степен што сега се бориме против делта сојот, што е неверојатен сој во смисла на тоа дека се работи за истиот вирус, освен што е способен да се шири исклучително брзо и успешно. За жал, се што досега научивме за делта сојот е дека ќе следуваат уште смртни случаи. На глобално ниво ќе се појават повеќе инфекции, без разлика што правиме, иако имало ситуации кога сме можеле да донесеме и подобри одлуки. Во моментов мислам дека ситуацијата е многу подобра затоа што имаме можности кои се ефективни и безбедни, а тоа се вакцините. Иако можеме да бидеме горди бидејќи голем број луѓе низ целиот свет се вакцинирани, знаеме дека имаме 70 милиони луѓе кои не се вакцинирани. Некои смртни случаи би можеле да се спречат, но ние секако можеме да ги спречиме уште повеќе ако се вакцинираме“, посочува тој.
2. Новата таблета против болеста е голема работа, но и понатаму се уште треба да се вакцинирате
Д-р Фаучи се согласува дека се работи за голем исчекор, а станува збор за мала молекула, лек што може да се зема орално, а објавените резултати од тестирањето се секако импресивни.
„Ако ги погледнеме статистичките анализи, јасно е дека бројот на смртни случаи и хоспитализации ќе се намали до 50 проценти. Важно е да се спомене дека имало две групи испитаници, оние на кои им бил даден лажен лек (плацебо) и оние на кои им е даден вистински лек. Се испоставило дека во групата каде испитаниците го земале вистинскиот лек немало смртни случаи, а во втората група, 8 лица починале од Ковид-19. Како и да ја вртите оваа приказна, резултатите се импресивни. Секако дека сме возбудени што ќе ја имаме и оваа опција, но сепак, тоа не значи дека вакцината не е потребна. Таквите информации се погрешни затоа што треба да запомните дека иако постои оваа нова пилула, наједноставниот начин да се избегне хоспитализација и смрт е токму вакцинацијата“, вели д-р Фаучи.
3. Дали наскоро ќе бидеме вон опасност?
„Работите се менуваат кога зборуваме за тековната пандемија, но бидејќи живееме 20 месеци со пандемија што беше на својот врв, потоа опаѓаше, потоа повторно дојде до пораст на бројот на заболени… За да можеме да направиме уште една пауза и конечно да кажеме дека се е зад нас, треба да го направиме она што веќе го споменавме: вакцинирајте се. Кога имате 70 милиони луѓе во една земја на кои им е дозволено да се вакцинираат, но одбиваат да го сторат тоа, јасно е што е всушност опасната зона. Значи се работи за нашата способност да обезбедиме еден вистински оптимистички пресврт на ситуацијата… И пак повторувам, ова може да се очекува ако сите се вакцинираме“.
