Децата на кои им недостига родителско внимание често тоа го покажуваат на многу необични начини, што дури ни нивните родители тоа не можат лесно да го препознаат. Како што пренесува Times of India, психолозите токму поради тоа, истакнале неколку знаци кои укажуваат дека на детето му треба повеќе внимание.
Многу е приврзано
Доколку детето е исклучително приврзано за родителите и не сака да се одвои од нив, психолозите предупредуваат дека токму тоа е еден од знаците дека му треба повеќе внимание. Децата може да го покажат ова однесување поради неколку причини. Некогаш тоа може да биде затоа што добиваат премногу внимание, а понекогаш може да биде токму поради недостаток од него. Во секој случај, родителите мора да бидат свесни дека приврзаноста често произлегува од потребата детето да се чувствува безбедно и заштитено.
Има чести тантруми
Иако тантрумите или изливите на бес се сосема вообичаена појава кај децата, понекогаш тие може да укажуваат на недостаток на внимание. Дете на кое му недостасува внимание, првенствено од неговите родители, често се обидува да направи апсолутно се што е во негова моќ за да го добие. Тоа најчесто се обидува да го постигне токму со тантруми кои подразбираат викање, плачење или фрлање на под.
Покажува знаци на агресија
Родителите често се загрижени кога детето ќе почне да покажува агресивно однесување, но всушност најчесто се работи за привлекување внимание поради негово недостаток. Психолозите објаснуваат дека децата кои се желни за внимание, често прибегнуваат кон агресивно однесување. Тоа може да вклучува фрлање работи, удирање, самоповредување и сè друго што може да ги доведе во опасност нив или другите. Имено, агресијата е еден од најлесните начини веднаш да го привлечете вниманието на родителите.
