Одвикнувањето од пелени и учењето на детето да користи нокшир е процес кој на многу родители им задава главоболки. Сепак, не мора да биде така. Воспитувачка со повеќе од 20 години искуство во градинка открива дека процесот често е отежнат поради неколку грешки кои родителите несвесно ги прават.
„Родителите мислат дека едноставно треба да го стават детето на нокшир и тоа е сѐ, но токму тоа е причината зошто ништо не функционира кога ќе се обидат да го одвикнат од пелени“, објаснува таа.
Како воспитувачка која помогнала на стотици деца да ја совладаат оваа важна животна вештина, таа забележала дека најчести се три грешки кои го прават одвикнувањето потешко.
- Го брзаат процесот
Многу родители мислат дека „времето дојде“ детето да почне да користи ноша, бидејќи е „доволно големо“. Но, притоа ја занемаруваат многу поважната работа – сигналите дека детето е навистина подготвено. Кога детето се брза или се притиска, тоа може да развие отпор, потреба за контрола или дури и страв од самиот нокшир.
Воспитувачката советува: следете ги знаците – дали пелената останува сува подолго време? Дали детето покажува интерес за тоалет или ноша? Тогаш е вистинскиот момент!
- Користат пелени-гаќички
Многу родители мислат дека пелените во форма на гаќички ќе им помогнат на децата побрзо да се одвикнат од пелените. Но, според воспитувачката, тие се всушност иста работа – само се облекуваат поинаку. „Децата не чувствуваат разлика, а токму чувството на влажност е тоа што им помага да научат,“ вели таа.
Нејзиниот совет: користете обичен, памучен долен веш додека трае процесот на одвикнување.
- Пречесто ги потсетуваат
„Постојаното прашување: ‘Дали ти се мочка?’ може да го иритира детето и да создаде отпор,“ предупредува таа. Наместо тоа, креирајте рутина – одете заедно во тоалет по оброци, пред излегување од дома или по попладневно дремење.
Правилниот пристап, трпение и препознавање на сигналите од детето се клучни за успешно и помалку стресно одвикнување од пелени.
