Вакцинирањето со двете вакцини истовремено е безбедно, според упатствата на Американскиот центар за контрола и превенција на болести (ЦДЦ)
Сите знаеме колку е важно да се вакцинирате против Ковид-19, но со доаѓање на постуденото време, време е да размислите и за грипот.
По минатогодишната многу блага сезона на грип, многу луѓе може да се запрашаат дали вакцинацијата против грип е од суштинско значење оваа година. Други пак може да бидат загрижени за примањето на две вакцини одеднаш за време на истата посета на вакциналниот пункт, бидејќи дозите на вакцини се обично распоредени на одреден период. Експертите објаснуваат се што треба да знаете.
Вакцинирањето со двете вакцини истовремено е безбедно, според упатствата на ЦДЦ
Американскиот центар за контрола и превенција на болести (ЦДЦ) во упатствата за сезоната на грип 2021-2022 потврди дека „да, добро е да се добијат вакцини против Ковид-19 и грип истовремено“.
„Примањето вакцина против грип е суштински дел за заштита на вашето здравје и здравјето на вашето семејство секоја година. Преземете ги препорачаните мерки на претпазливост за да се заштитите од Ковид-19 додека ја примате вакцината против грип“, напишаа од ЦДЦ.
„Во суштина, секој треба да се вакцинира против грип“, вели д-р Лен Хоровиц, интернист и пулмолог во болницата „Ленокс Хил“ во Њујорк, за „Healthline“. „Нема причина, освен ако нема алергија на вакцина, историја на Guillain-Barré, или понекогаш има луѓе со мултиплекс склероза што не треба да се вакцинираат, но тоа се невообичаени случаи“.
Студија на Универзитетот Бристол во Обединетото Кралство испитувала дали засилувачките, бустер вакцини против Ковид-19 можат безбедно да се дадат истовремено со вакцините против грип.
Студијата ComFluCov открила дека многу групи можат безбедно да примат бустер доза заедно со вакцината против грип.
„Додека ние обично сакаме да поминат неколку недели помеѓу вакцините, и во минатото тоа и го баравме, се чини дека вакцината против грип и mRNA вакцините може да се дадат заедно“, рече д-р Хоровиц.
Може да се заразите со грип и Ковид-19 во исто време
Д-р Тереза Мареј Амато од Итна медицина во Лонг Ајленд Еврејски Форест Хилс во Њујорк, потврди дека „дефинитивно“ може да се заразите и со коронавирусот и со вирусот на грип во исто време.
„Во пролетта 2020 година, видовме неколку пациенти кои беа позитивни и за грип и за Ковид-19“, рече таа.
Додека Ковид-19 е многу поопасен од грипот, грипот сепак може да биде сериозен за некои групи, предупреди д-р Амато. Одредени луѓе, вклучително и многу млади и многу стари, можат да бидат изложени на зголемен ризик од тешки, па дури и опасни болести.
„Дефинитивно препорачуваме вакцина против грип за секој што има право на неа“, рече таа. „Но, особено во групите со поголем ризик“.
- Д-р Хоровиц вели дека комбинацијата на зараза со Ковид-19 и грип „може да биде прилично смртоносна“, особено за луѓето од високоризични групи
Како и да е, иако д-р Амато рече дека „апсолутно“ можете да добиете и вакцина против грип и вакцина против Ковид-19, таа нагласи дека е најдобро прво да разговарате со вашиот лекар за тоа каков треба да биде тајмингот за двете вакцини.
Заклучок
Сезоната на грип брзо се приближува, а здравствените експерти велат дека е безбедно да се вакцинирате против Ковид-19 и против грип во исто време. Експертите потврдуваат дека е можно да се заразите истовремено и со вирусот на грип и со коронавирусот, а последиците би можеле да бидат смртоносни. Тие, исто така, велат дека прво треба да поразговарате со вашиот лекар за да дознаете дали примањето на двете вакцини во исто време е соодветно за вас. (Healthline)
