Болеста на рацете, нозете/стапалата и устата најчесто се јавува кај деца на возраст под пет години, иако може да се јави кај секого. Вирусот што ја предизвикува оваа болест генерално не е опасен, но е многу заразен, а се манифестира со осип и плускавци по усните, дланките и нозете, кои изгледаат слично на сипаници.
Покрај овие симптоми, обично се јавува и покачена температура, како и болка во грлото, а бидејќи е многу заразен, овој вирус многу лесно се шири во градинките и училиштата. Симптомите кај заразените деца обично се повлекуваат по седум до десет дена, посочуваат од Центарот за превенција и контрола на болести.
Компликациите поради оваа болест се многу ретки, но дефинитивно треба да бидете внимателни и да ја следите состојбата на детето.
Како се пренесува
Болеста на рацете, нозете/стапалата и устата е предизвикана од вирус, кој се пренесува преку:
- Капков пат кога заразеното лице кива, кашла или зборува
- Контаминирани предмети и површини
- Течноста од плускавците
- Измет
Превенција
Како што истакнуваат лекарите, болеста на рацете, нозете/стапалота и устата е многу заразна, а еве што е најдобрата превенција:
- Редовно и темелно миење на рацете, особено по користење на тоалет, кашлање, кивање, бришење на носот.
- Избегнувајте допирање на лицето со неизмиени раце, особено очите, носот и устата.
- Често чистење на површини и предмети кои заразеното дете ги допира, како играчки и кваки во куќата.
- Избегнување близок контакт со заразено лице, како што се прегратки или бакнежи.
Третман и закрепнување
Во повеќето случаи, оваа болест не е опасна и симптомите генерално поминуваат за седум до десет дена. Во меѓувреме, можете да се обидете да ги ублажите симптомите што ги чувствува детето:
Олеснете ја болката и спуштете ја температурата со лекови, секогаш земајќи ја предвид дозата што е соодветна за децата.
Спречете дехидрација – погрижете се детето да внесува доволно течности. Осипот и плускавците во устата може да бидат многу болни, што им отежнува на децата да голтаат, но внимавајте малечкото да внесува доволно течности за да избегне дехидрација.
