Веста за смртта на 11-годишното момче кое викендов почина на Клиниката за инфективни болести „Д-р Фран Михаљевиќ“ во Загреб, како последица од инфекцијата со коронавирус го потресе регионот. Станува збор за најмладото починато лице од последиците од новиот коронавирус во Хрватска. „Кога ќе изгубите дете, повеќе не ве интересираат никакви бројки“, рече хрватскиот научник и директор на Институтот за биохемија (IBC2) во Франкфурт, Иван Џикиќ, за хрватските медиуми.
Мултисистемскиот воспалителен синдром MIS-C, кој може да се јави кај некои деца неколку недели по инфекцијата со SARS-CoV-2, според хрватскиот научник, и не е многу редок.
„Тоа не е толку ретко. Во Хрватска имаше над 30 случаи на системска воспалителна реакција, односно кога болеста предизвикана од коронавирусот ги погодува сите органи во телото, а не само белите дробови. За ова треба повеќе да се зборува меѓу педијатрите“, апелира Џикиќ, а пренесува Н1.
„Во ситуација кога детето има висока температура, осип, болка во грлото, болки во стомакот, повраќање, дијареја, повеќето луѓе секако одат во здравствени установи. Напомена и за здравствените работници – да размислуваат за овој синдром, децата да се тестираат, особено ако родителите знаат дека детето престојувало некаде каде што имало позитивни лица“, порача проф. д-р Алемка Маркотиќ, специјалист инфектолог и директор на Клиниката за инфективни болести во Загреб.
Во Хрватска досега се забележани над 30 случаи на системска воспалителна реакција кај децата, односно кога болеста предизвикана од коронавирусот ги погодува сите органи во телото, а не само белите дробови
Во Хрватска досега имало 30 случаи, а само во Сплит досега биле спасени осум деца со мултиоргански воспалителен синдром (MIS-C).
Осум деца со дијагностициран мултиоргански воспалителен синдром (MIS-C) биле хоспитализирани на Клиниката за детски болести во Сплит, но сите биле излекувани, иако две биле во животна опасност, објави шефот на клиниката Веселин Шкрабиќ, а пренесува „Хина“.
Запрашан да го коментира случајот на смртта на 11-годишното момче во Загреб, кај кое инфекцијата со COVID предизвикала MIS-C, ретка компликација која во Хрватска досега се појавувала во поблага форма, Шкрабиќ објасни дека тоа е синдром кој ги погодува децата до петнаесет години поради специфичниот имунолошки одговор.
Овој синдром е откриен во април минатата година. Реакцијата може да биде целосно асимптоматска, без никакви знаци.
„На Клиниката хоспитализиравме осум пациенти со критериуми на болеста кои ја исполнија дијагнозата на MIS-C. За среќа, сите беа излекувани, од нив двајца беа во витално загрозувачка состојба со сериозна клиничка слика“, рече Шкрабиќ.
MIS-C се јавува кај здрави деца, односно кај оние кои немаат никакви коморбидитети
Децата биле лекувани со имуноглобулини и кортикостероиди заедно со друга терапија за поддршка, како и индивидуална терапија прилагодена на пациентот. Шкрабиќ вели дека ваквите случаи се јавуваат кај здрави деца, т.е. кај оние кои немаат коморбидитети.
За оваа состојба, која се јавува кај децата неколку недели откако го прележале COVID-19, или пак имале контакт со заболен, беше алармирано и од страна на нашите педијатри. Прв меѓу нив беше прим. д-р мед. науки Душко Фидановски, специјалист педијатар-неонатолог, кој уште кон средината на декември минатата година, јавно, во ТВ Дневникот на „Сител“ истакна дека на клиниката каде што работи биле третирани седум дечиња со дијагноза на MIS-C (во меѓувреме бројката дојде до девет). За среќа, нивното лекување е завршено успешно, но следи период на набљудување на нивната состојба, пред се, поради нејаснотиите околу (не)постоењето на можните последици кои овој синдром би можел да ги остави врз децата.
Претходно, на постоењето на MIS-C во нашата земја укажа и детскиот кардиохирург д-р Владимир Чадиковски, кој на социјалните мрежи објави дека кај деца кои прележале COVID-19 се јавиле тешки пост-ковид компликации.
„ПОВЕЌЕОРГАНСКИ ИНФЛАМАТОРЕН СИНДРОМ кај деца по прележан К19.
- 4-5 нед.по прележување
- ПСР нег.
- IgG антитела 10 пати повеќе
- 39-40 темп.
- Срцева деком.
- Бубрежна инсуф.
- Д димери зголемени
- Коагулопатија
- Осип по кожа
- Коњуктивит
- Кашлица,тешко дишење
- До сега третирани 8 деца кај нас!“,
напиша д-р Чадиковски, истовремено апелирајќи до родителите да бидат „екстремно внимателни по постоење на висока температура по прележен Ковид кај децата. Ако на време се започне третманот, последиците се минимални, пред се, промените на срцето и бубрезите“, допиша д-р Чадиковски.
И словенечките педијатри предупредуваат на невообичаени болести и компликации кај деца кои го преболеле COVID-19. Словенечките педијатри досега откриле околу 50 случаи на необични болести и компликации кај малите пациенти кои ја прележале инфекцијата со коронавирус.
„Најчести меѓу нив се мултисистемски воспалителен синдром кај децата (MIS-C) и воспаление на малите крвни садови поврзани со COVID-19 (васкулитис/васкулопатија)“, наведе во изјава за медиумите Тадеј Авчин, шеф на Одделот за алергологија, ревматологија и клиничка имунологија на Клиниката за детски болести во Љубљана.
Мултисистемскиот воспалителен синдром е предизвикан од прекумерен имунолошки одговор, а децата пред доаѓањето во болница биле здрави и немале хронични болести, рече Авчин, додавајќи дека кај оние кои имале асимптоматска инфекција, компликациите се појавиле подоцна отколку кај оние со изразени симптоми на COVID-19. Мултиорганскиот воспалителен синдром во моментов е најчестата имунолошка (неинфективна) инфламаторна болест кај децата во Словенија, а педијатрите во моментов немаат податоци за долгорочниот тек и можноста за рецидив.
