Еден од најлесните начини да го смирите расплаканото бебе и да му помогнете полесно да заспие е да го лулате во прегратка. Сепак, дали е ова добро решение?
Едно од предупредувањата кое родителите одновно и одново ги слушаат е дека не треба да го навикнуваат бебето да им заспива во раце, бидејќи така ќе се лула до градинка. Меѓутоа, освен со ова, оваа активност никако не може да му наштети на бебето.
„Секогаш е во ред да успиете бебе помало од четири месеци во прегратка и да го ставите во креветче на правилен начин – да лежи на грб на рамна површина„, истакнува Сатја Нарисети, доцент на Катедрата по педијатрија на Универзитетот Рутгерс.
„По третиот или четвриот месец, кога бебето ги развива редовните навики за спиење и кога веќе може подолго да спие преку ноќ, можеби би требало да размислите дали е во ред да го успивате во раце. Сепак, секое бебе е поинакво, како и семејството, но би било добро со оваа навика да престанете пред бебето да прооди„, вели д-р Нарисети.
„За правилен развој многу е важно децата да може со тек на време сами да се успиваат и доколку се разбудат преку ноќ, без ничија помош повторно да заспијат„, објаснува таа.
Бебето можете полека да го навикнувате само да се успива така што ќе го ставите во креветче додека се уште е будно и ќе го пуштите самото да се успива. Воспоставувањето на рутината пред спиење исто така поттикнува добар сон.
