Исто како и кај возрасните, и кај децата кошмарите се честа појава. Различни истражувања покажале дека речиси 50 отсто од децата се соочуваат со кошмари. Да тие не се појавуваат и станат зачестени, експертите ги советуваат родителите да преземат одредени чекори за да им помогнат на своите деца.
Ако вашето дете има кошмари и ви доаѓа расплакано среде ноќ, секако обидете се со овие експертски совети.
Отворено разговарајте со детето
Кошмарите за сите се вознемирувачки, особено за децата. Затоа е потребно да ги уверите дека во нивниот кревет се безбедни и дека она кое го искусиле не е реалност. Поразговарајте со нив во тивка и мирна средина, прашајте ги што сонувале и помогнете им да го процесуираат конкретниот кошмар. Кажете им дека е во ред понекогаш да се биде исплашен и потсетете ги дека вие сте тука да ги заштитите и утешите.
Помогнете му на детето да се соочи со своите стравови
Наместо само да ги штитите вашите деца од нивните кошмари, научете ги како да зацврснат. Тоа можете да го направите така што ќе му помогнете на детето да се соочи со неговите стравови од околината. На пример, вашето дете навечер се плаши од кукла чии очи сјаат во темница. Дозволете му на детето да ја гледа куклата во текот на денот и пред спиење. Така ќе сфати дека тоа е само кукла и дека не е ништо страшно. Исто така, можете да му дозволите да ја држи играчката со изгасено светло додека вие сте се уште во собата, за да му правите друштво. Смирете го детето со охрабрувачки зборови за да знае дека куклата нема да го повреди.
Тргнете го она од што се плаши детето
Понекогаш причината за кошмарите на вашето дете може да биде нешто со кое се сретнало во реалниот живот. Ако е тоа случај и успеете да сфатите од што се плаши, најдобро е да се држи дистанца помеѓу детето и изворот на неговите стравови. Тоа може да биде нешто што го виделе, како сцена од страшен филм, или личност од неговата околина која им е непријатна.
Претворете ги негативните сеќавања во позитивни
Колку и да сакате да ги заштитите вашите деца од сите страшни работи на планетата Земја, тоа не е можно. Она што е можно е да ги претворите негативните сеќавања на детето во позитивни. На пример, вашето дете гледало филм со многу страшни чудовишта и сега не може да заспие. Она што секогаш помага е да им се побјасни на децата дека чудовишта не постојат. Ако и понатаму им е тешко да спијат ноќе сами, помогнете им да смислат смешна песна или рима за да се чувствуваат похрабри и посилни од чудовиштата. Погрижете се таа песна да има среќен крај за вашето дете да не се плаши.
Направете позитивна атмосфера пред спиење
Кога детето е опуштено, полесно ќе заспие. За да му помогнете да се смири и да се подготви за ноќта, елиминирајте ги сите звучни пречки, силни светла или возбудливи игри и активности кои би можеле да го расонат детето пред спиење. Тргнете ги тие пречки барем половина час пред детето да ја почне својата рутина за легнување во кревет. Обидете се да пуштите смирувачка музика, да читате среќна книга или заедно да слушате некои аудио снимки на медитации за спиење. Овие активности ќе му овозможат на детето да го релаксира умот и телото пред спиење.
