На многу родителите чии деца одат во училиште или градинка, им се чини дека нивните деца се често болни. Иако некои инфекции како грип, настинка и воспаление на увото се вообичаени за детската возраст, родителите неретко се плашат ако инфекциите често се повторуваат и мислат дека можеби нешто не е во ред. Децата од предучилишна возраст во просек може да добијат 7 до 8 настинки годишно, додека оние кои одат во училиште настинати се 5 до 6 пати годишно, па затоа не е чудно што на родителите им се чини дека нивните деца постојано се болни.
Како да го намалите бројот на инфекции кај децата?
Децата секојдневно доаѓаат во близок контакт во текот на играњето и учењето, што претставува идеален начин на ширење на инфекциите во рамките на колективот. Иако е вообичаено децата да се разболуваат почесто од возрасните, тоа може да биде исцрпувачко за родителите, особено ако децата навечер се будат со покачена температура или поради болки. За жал, не е можно во целост да ги заштитиме децата од бескрајната низа на бактерии и вируси, но можно е да се намали шансата за развој на болести. Тајната лежи во усвојувањето на здрави, а исфрлањето на нездравите навики кај децата, а токму вие како родители имате клучна улога во тоа.
- Редовно и темелно миење на рацете
Иако децата ја имаат усвоено навиката да ги мијат рацете, во повеќето случаи не ги мијат темелно, туку кратко ги ставаат рацете под млаз вода и нежно ги тријат дланките со сапун. Неправилното миење на рацете е речиси исто како и воопшто рацете да не се измиени. Кога сте дома, лесно можете да проверите дали вашето дете добро ги измило рацете, но кога детето е на училиште или во градинка не можете да го имате под контрола. Затоа е важно дасо ваш пример му помогнете на детето да усвои рутина на темелно миење на рацете, за да бидете сигурни дека ќе ги измие правилно секогаш кога не сте во близина.
- Избегнување на делење предмети со други деца
Децата се вистински професионалци кога станува збор за споделувањето микроби. Кога се болни, децата не престојуваат во колективот, но проблемот е што децата се заразни неколку дена пред да развијат симптоми. Вашето дете нека користи сопствен училишен прибор и работи како што се заштитни маски, шишиња со вода и слично, за да не ги позајмува од други деца и да ризикува да се зарази со користење на туѓ предмет.
- Основни правила на бонтон
Навиките како што се грицкање нокти, кивање и кашлање без покривање на носот и устата, како и ставањето прсти во уста се непожелни не само поради бонтон, туку и поради потенцијални зарази. Ако вашето дете сака да грицка нокти, објаснете му колку е опасно и помогнете му да се ослободи од оваа грда навика. Погрижете се да ги држи рацете подалеку од устата, носот и очите и секогаш со себе да има марамчиња со кои ќе ги покрие устата и носот кога кива и кашла.
- Редовна физичка активност
Истражувањата покажуваат дека редовната физичка активност може да го зголеми бројот на клетки кои се борат против инфекции.Иако спортувањето стана вистински предизвик поради пандемијата, овозможете му на вашето дете барем еден час дневно активно да го поминува. Активноста не мора нужно да биде поврзана со спорт, бидејќи и обична игра во парк може многу да направи за здравјето на вашето дете.
- Доволно сон и квалитетна исхрана
Нездравата исхрана и недостатокот на сон имаат влијание врз имуниот систем, што може да го направи организмот на детето поподложен на болести. Охрабрете го вашето дете да усвои здрава рутина за спиење, која вклучува порано легнување за да спие доволно во текот на ноќта. Освен тоа, обезбедете му исхрана богата со овошје, зеленчук, интегрални житарки и здрави масти.
