Студијата спроведена врз 500 жени кои биле бремени во тоа време или неодамна се породиле покажала дека поради грижата да не предизвикаат алергија кај детето четвртина од нив во бременоста престанале да јадат јаткасти плодови, 20% од нив се откажале од храна со глутен, а 16% внимавале да не внесат полен во организмот.
Покрај тоа, 57% биле загрижени и дали ќе ги пренесат нивните постоечки алергии на детето, со тоа што 41% од бремените жени кои страдале од поленска треска, не знаеле дали треба да продолжат со лековите и сметале дека се лошо информирани.
Општиот лекар и експерт за семејно здравје д-р Ширин Емадосадати го нарачала гореспоменатото истражување за разоткривање на различните митови за алергиите во бременоста како дел од Неделата за подигање на свесноста за алергиите (24-30 април).
Мит е дека алергијата и нетолеранцијата се иста работа; иако некои симптоми може да бидат слични, нетолеранцијата на храна може да предизвика надуеност, абдоминална непријатност итн., додека алергиите можат да бидат опасни по живот
„Разбирливо е дека многу идни мајки се грижат поради алергиите и пренесувањето на чувствителноста на нивното дете, но некои истражувања покажуваат дека изложеноста на вообичаени алергени како полен, јаткасти плодови и јајца за време на бременоста всушност може да биде корисна“, рече таа.
И додека денес 22% од трудниците сметаат дека немаат доволно информации за алергените и влијанието врз бебето, пред неколку децении тоа загрижувало дури 40% од нив. Денеска, според истражувањата, 42% од идните мајки ќе се обратат до бабиците со такво прашање, 37% ќе им го постават на лекарите, додека 27% од нив ќе бараат одговори на Гугл, пренесува „Вечерњи лист“.
„Како и со многу состојби во бременоста, и со алергиите се појавуваат многу митови и полувистини“, вели Емадосадати и додава дека бременоста не е причина жените со алергии да трпат и патат. Еве што друго вели таа, кои верувања за алергиите се вистинити, а кои митови:
- мит е дека алергиите се влошуваат со секое изложување на алергенот,
- точно е дека симптомите на поленска треска може да се влошат за време на бременоста,
- мит е дека алергијата и нетолеранцијата се иста работа; иако некои симптоми може да бидат слични, нетолеранцијата на храна може да предизвика надуеност, абдоминална непријатност итн., додека алергиите можат да бидат опасни по живот,
- точно е дека алергијата на полен понекогаш може да исчезне или да се ублажи со текот на годините,
- мит е дека медот може да ги намали симптомите на алергија на полен.
