Зад нас е првата недела од градинка и училиште, а некои деца се уште не успеале да се вратат на својата рутина. Експертот за спиење, Мартин Сили вели дека постои вкусен меѓуоброк кој може да им помогне на децата полесно и побрзо да заспијат.
„Она што вашето дете го јаде пред спиење може да придонесе за тоа дали ќе спие добро или лошо. Храната како што се овесните бисквити, бананите и млекото содржи триптофан, кој ја поттикнува поспаноста“, изјави тој за The Mirror.
Се смета дека храната која содржи триптофан предизвикува сон, па затоа треба да се јаде еден час пред спиење за да се апсорбира правилно.
„Исто така, обидете се да бидете цврсти и не дозволувајте децата да стануваат од кревет кога ќе ги исклучите светлата. Дајте им до знаење дека кога одат да си легнат, мора да останат во кревет. Ако стануваат, не реагирајте бурно, но вратете ги назад во кревет. Спроведете правило – кога се во кревет, во кревет се до утро“, сугерира тој.
Многу е важно да ги отстраните сите електронски уреди најмалку два часа пред спиење. Создадете вечерна рутина која вклучува вечера, туширање и приказна пред спиење наместо да ги оставите децата да заспијат гледајќи цртани филмови.
