Бројни студии истакнуваат дека ризикот од ненадејна смрт на новороденче (СИДС) е најмал ако бебето спие на грб.
Најпожелна положба е спиење на грб. Но, разумен втор избор, ако вашто дете има проблеми со таквата положба, е спиењето на страна. Секако, ова е побезбедно од спиењето на стомак. Инаку, безбедно е да му дозволите на бебето извесно време да помине и лежејќи на стомаче кога е будно, додека вие го набљудувате.
Немојте да го ставате детето да спие на мека подлога, меки перници и играчки или некои други украсни додатоци. Тие може да ги покријат дишните патишта на детето и да го стопираат дишењето. Не се предлага ниту користење на специјални помагала кои им обезбедуваат на децата присилно да спијат на грб.
Советот бебето да го ставите на грб важи ако е родено на време и штотуку отпуштено од болница. Но, ако има одредени здравствени проблеми и не сте сигурни која положба е најдобра за него, консултирајте го вашиот педијатар.
Во секој случај, родителите не би требало бебето да го оставаат само во просторија, дури ни во текот на кратко дневно спиење. Најдобро е и преку ден бебето да спие во близина на родителите, да го имаат во видно поле, а преку ноќ во соба со него.
