Заморот е нормална појава во бременоста. Особено во првото и третото тромесечје, кога вашето тело произведува нови хормони, односно го подготвува телото за породување.
Во почетокот на бременоста, телото произведува повеќе од хормонот прогестерон, кој може да биде виновник за поспаноста и забавеноста. Покрај тоа, телото произведува повеќе крв за да ги пренесе хранливите материи до детето, што значи повеќе работа за срцето и другите органи. Организмот го менува и начинот на кој ја вари храната и хранливите материи.
Сите овие промени се стресни за организмот и може да предизвикаат замор. Во подоцнежната бременост, дополнителната тежина на детето ја одзема силата на вашето тело. Потешкотиии при спиење, потреба за мокрење во текот на ноќта, ноќни грчеви во нозете… се некои од проблемите кои предизвикуваат замор во бременоста.
Заморот, исто така, може да биде и симптом на анемија од која страдаат речиси половина од бремените жени. На телото му треба железо за производство на хемоглобин, материја во црвените крвни клетки, која им овозможува да носат кислород до ткивата и до детето. Зголемената потреба за железо во текот на бременоста се должи на потребите на детето, зголемување на нивото на производство на крв во организмот и губење на крв за време на породувањето. Ако покрај заморот, лесно останувате без воздух, бледи сте, слаби и имате вртоглавици најверојатно се работи за анемија.
ОСУМ ТОП СОВЕТИ
- Одморајте колку што е можно во текот на денот, а на работа користете чести паузи.
- Променете ги вашите навики и легнувајте си порано.
- Балансирајте ја исхраната со многу железо и протеини. Посебно е важно да јадете храна богата со железо: црвено месо, риба, живина, житарки со цели зрна, грав, ореви и зелен лиснат зеленчук. Пијте сок од лимон, кој му помага на вашето тело подобро да го апсорбира минералот.
- Избегнувајте често станување ноќе. Пијте течности порано во денот, одбегнувајќи тоа да го правите два до три часа пред спиење. Јадете неколку часа пред спиење и нежно истегнете ги мускулите на нозете пред да заспиете за да одбегнете грчеви.
- Вежбајте најмалку 30 минути на ден. Дури и обично пешачење ќе го врати нивото на енергија во телото.
- Опуштете се и избегнувајте стрес. Во овој период намалете ги активностите кои ве заморуваат и фокусирајте се на хоби или нешто што ќе ве релаксира.
- Ако почувствувате ненадеен замор, замор кој не исчезнува ни после одмор, тежок замор во второто тримесечје или депресија, побарајте совет од лекар.
