Доброволец може да биде секој кој е постар од 18 години, кој не бил болен и не боледува од коронавирус, не примал никакви вакцини во последниот месец, нема антитела на корона, нема алергиски реакции и е без хронични болести. Бремените жени и доилките не можат да учествуваат во студијата
♦♦♦♦♦♦♦
Тестирањето на вакцината „Спутник лајт“ против коронавирус започна во Русија. Првите волонтери веќе се вакцинирани во Москва.
„Во зависност од тоа како доброволците ќе ги поминуваат прегледите така ќе се зголемува и обемот на вакцинација. Активно се поднесуваат апликациите, 490 лица го поминале медицинскиот преглед за два дена“, информира Анастасија Ракова, заменик-градоначалник на Москва задолжена за прашања од социјален развој, пренесува „Нова“.
Таа потсетува дека доброволец може да биде секој кој е постар од 18 години, кој не бил болен и не боледува од коронавирус, не примал никакви вакцини во последниот месец, нема антитела на корона, нема алергиски реакции и е без хронични болести. Бремените жени и доилките не можат да учествуваат во студијата.
„Се претпоставува дека оваа вакцина ќе ја употребуваат млади луѓе на возраст од 18 до 30 години, кои развиваат добар имунолошки одговор и кај кои се развива доволно ниво на антитела веќе при првата репликација. „Спутник лајт“ во комбинација со „Спутник V“ ќе обезбеди повеќе можности за вакцинација“, објаснува Ракова.
Тестирањето на вакцината Спутник V за деца може да се започне само откако ќе се добие трајна потврда за регистрација на вакцината за возрасни, кога конечно ќе се сумираат резултатите од клиничките пострегистрациони испитувања
Таа потсети дека во Москва е планирано тестирање и на назална вакцина против коронавирус, но испитувањето не може да почне се додека не се добие одобрение од Министерството за здравство на Русија. Како што вели, назалните форми на вакцини веќе постојат, на пример, вакцината против грип.
Исто така, во Москва е планирано и испитување на вакцината против коронавирус за деца.
„Тестирањето на вакцината Спутник V за деца може да се започне само откако ќе се добие трајна потврда за регистрација на вакцината за возрасни, кога конечно ќе се сумираат резултатите од клиничките пострегистрациони испитувања. Се надеваме дека ова прашање ќе се реши во рок од неколку месеци“, изјави заменик-градоначалничката на Москва.
Ракова додаде дека веќе започнале со тестирање на стабилноста на имунитетот по вакцинирањето, што ќе овозможи да се утврди кога вакцинираните лица ќе мора повторно да ја примат вакцината.
Кон крајот на летото, врз основа на собраните податоци, треба да се донесе одлука дали повторно ќе се вакцинираат луѓето кои ја примиле вакцината есента минатата година.
