ПИШУВА:
Катерина Шекеровска-Димовска
katerina@pedijatar.mk
Вториот симпозиум на Педијатриското респираторно здружение (ПЕДИАРЕС), посветен на „Алергии во детска возраст“ ги надмина очекувањата, побудувајќи голем интерес меѓу педијатрите, семејните доктори, докторите на школска медицина, супспецијалистите по пулмологија, микробиолози, хирурзи, ОРЛ специјалисти, офталмолози и сите други кои беа дел од совршено организираниот тридневен настан, кој се одржа од 10 до 12 мај во хотелот „Хилтон“ во Скопје.
Постои општ тренд на зголемување на алергиите кај децата во многу делови од светот, па и кај нас. Причините за порастот на деца кои страдаат од алергии не се целосно јасни, но дел од нив секако се промените во животната средина, како што се зголемената изложеност на загаден воздух, но и промените во исхраната и начинот на живот, кои исто така може да влијаат на развојот на алергиски реакции кај децата. Теоријата на хигиена сугерира дека модерниот начин на живот, кој вклучува помала изложеност на бактерии и инфекции во раното детство, може да доведе до нерамнотежа во имунолошкиот систем и зголемена подложност на алергии. Неизоставно, како една од причините за појава на алергии е и генетиката, односно наследните фактори, па децата чии родители се алергични имаат поголем ризик да развијат алергии. Изложеноста на алергени, како што се прашина, полен, домашни миленици, одредени состојки на храната – се уште една причина за појава на алергиски реакции кај децата.
Превенцијата, раното препознавање и соодветен третман на алергиите може да помогне во управувањето со овие состојби и да го подобри квалитетот на животот на децата кои ги имаат.
„Најчести во доеначката возраст се атописките дерматити, кожните алергии од млеко или други хранителни производи, кај мало дете се застапени алергиски ринитиси, со чешање на нос, секреција, кашлица, солзење на очите, кај поголемите деца веќе се јавуваат повторувачки опструкции лекувани со инхалации, и астма“, објаснува проф. д-р Татјана Јаќовска, претседател на Педијатриско респираторно здружение (ПЕДИАРЕС) и организатор на Вториот симпозиум посветен на алергиите во детската возраст, проблем со кој се почесто се среќаваат децата и нивните родители, па оттука и потребата да се организира еден ваков настан кој на едно место ги собра сите засегнати професионалци кои ја работат оваа проблематика.
„Навистина сум задоволна од тоа како протекоа изминатите три дена. Добивме голем број на честитки и позитивни коментари за време на траењето и по завршувањето на Симпозиумот, што е дополнителна мотивација за ПЕДИАРЕС да организира нови стручни настани. 270 учесници, 32 предавачи од кои 14 беа надвор од земјава, 35 предавачи на апстракти… станува збор за навистина голем број на доктори кои ги презентираа своите искуства и придонесоа за едукација на колегите, со оглед на тоа што алергиите се најчести во детската возраст, а бројот на деца со алергии континуирано расте“, истакна проф. д-р Татјана Јаќовска, претседател на Педијатриското респираторно здружение (ПЕДИАРЕС)
Вториот симпозиум на ПЕДИАРЕС мина во прекрасна атмосфера, а го одбележаа врвни предавачи од земјава и странство, кои ги изнесоа своите искуства и ставови во дијагностика и лечење на повеќе патолошки состојби. Симпозиумот стартуваше со научна програма од областа на оториноларингологијата и имунизацијата, а на вакцините беше ставен посебен акцент, со што уште еднаш се потенцираше дека вакцинирањето е начин на кој можеме да се заштитиме себеси и нашите семејства, а имунизацијата на децата е клучна за зачувување на нивното здравје и благосостојба, како и за заштита на целото население од заразни болести. Во рамки на сесијата за имунизација беше презентиран и најновиот извештај на ИЈЗ за реализација на задолжителната вакцинација во РСМ во 2023, се говореше и за важноста на ротавирус вакцината – нејзиното место и улога во процесот на имунизација, како и за малите сипаници и медицинското значење на МРП вакцината.
По работниот дел на првиот ден на Симпозиумот следуваше и свечено отворање на настанот и коктел за добредојде. Огромна посетеност беше забележана и на вториот симпозиумски ден, кој мина во знакот на предавањата на кои беа презентирани искуства и новини во дијагностиката и терапијата на полето на алергиите и атопискиот дерматит. Последниот, трет ден, го одбележаа две сесии посветени на астмата во детската возраст во кои доминираа врвни предавачи од регионот, а беа претставени и над 30 постер презентации.
Вториот симпозиум на ПЕДИАРЕС мина во прекрасна атмосфера, а го одбележаа врвни предавачи од земјава и странство, кои ги изнесоа своите искуства и ставови во дијагностика и лечење на повеќе патолошки состојби
„Целта на Здружението е заемна ангажираност на сите педијатри пулмолози и педијатриски алерголози од окружението за подобрување на здравјето на децата на целиот Балкан. Покрај нашите експерти, колегите во Скопје имаа можност да ги проследат и предавањата на експерти од Центарот за алергии при клиничката болница Сребрњак, проф. д-р Мирјана Туркаљ и д-р Жељка Влашиќ-Лончариќ, проф. д-р Александар Совтиќ од Институтот за мајка и дете – Белград, проф. д-р Анѓелка Стојковиќ – директор на Педијатриска болница во Крагуевац, експерт за астма и нејзини фенотипови, проф. д-р Марина Атанасковиќ-Марковиќ од Универзитетска детска клиника Тиршова, експерт од областа на алергологија и имунотерапија, проф. д-р Гергана Стојанова – директор на Клиниката по педијатрија Александровска, нутриционисти експерти за нутритивна имунотерапија“, истакна проф. д-р Јаќовска.
Првиот човек на ПЕДИАРЕС не го криеше задоволството од успешно организираниот настан. „Навистина сум задоволна од тоа како протекоа изминатите три дена. Добивме голем број на честитки и позитивни коментари за време на траењето и по завршувањето на Симпозиумот, што е дополнителна мотивација за ПЕДИАРЕС да организира нови стручни настани. 270 учесници, 32 предавачи од кои 14 беа надвор од земјава, 35 предавачи на апстракти… станува збор за навистина голем број на доктори кои ги презентираа своите искуства и придонесоа за едукација на колегите, со оглед на тоа што алергиите се најчести во детската возраст, а бројот на деца со алергии континуирано расте – 90 % од децата кои доаѓаат на преглед кај мене се со алергиски ринитис, 10 % се деца со астма“, ни изјави проф. д-р Татјана Јаќовска, претседател на Педијатриско респираторно здружение (ПЕДИАРЕС).
Покрај презентирање на новините во дијагностиката и терапијата на полето на алергиите во детската возраст, симпозиумот беше и одлична можност за воспоставување нови професионални контакти и пријателства.
Погледнете (подолу) дел од атмосферата и предавачите на Вториот симпозиум на Педијатриското респираторно здружение (ПЕДИАРЕС) посветен на „Алергии во детската возраст“, кои ги забележа објективот на нашиот фотограф.
