За некои, помислата дека нешто не е во ред со здравјето на нивното дете е постојан страв. За жал, поради пренаталните инфекции, овие стравови можат да станат реалност за многу жени ширум светот.
Февруари е Меѓународен месец за превенција од пренатални инфекции, па затоа е важно да се одвои малку време и да се сврти вниманието на важноста од заштита на здравјето на трудниците, со цел да се спречат штетните инфекции.
Се проценува дека повеќе од 60% од жените во светот имаат барем една инфекција во текот на бременоста, најчесто во првиот триместар. Додека некои инфекции како обичната настинка не мора нужно да предизвика сериозни последици, други може да влијаат на развојот на детето и да доведат до предвремено породување и специфични проблеми.
Освен вообичаените болести, како што се, на пример, воспаление на мочниот меур и грип, бремените жени можат да добијат и некои инфекции кои можат да бидат особено опасни за време на бременоста:
- Бактериска вагиноза – честа инфекција која може лесно да се лекува, но може да предизвика проблеми на вашето бебе за време на бременоста; го зголемува ризикот од предвремено раѓање и ниска родилна тежина.
- Стрептокок група Б – вид на бактерија која се наоѓа во вагината и ректумот кај околу 25% од сите здрави возрасни жени. Иако не може да и наштети на мајката, може да се пренесе на бебето за време на породувањето и да доведе до сериозни инфекции како што се менингитис и сепса.
- Хепатитис – инфекцијата во бременоста се поврзува со послаб развој на фетусот, вклучувајќи ограничување на феталниот раст и мала тежина при раѓање.
- Сексуално преносливи инфекции – може да ја искомплицираат бременоста и сериозно да влијаат врз вас и вашето бебе во развој.
- Токсоплазмоза – една од најважните антропозоонози, болести кои се пренесуваат од животните на луѓе, инфекција со паразитот Toxoplasma gondii. Повеќето заразени доенчиња немаат симптоми при раѓање, но може да развијат сериозни симптоми подоцна во животот, како што се слепило или ментална неспособност.
- Листериоза – бактериска цревна инфекција која се појавува како последица од консумирање на храна контаминирана со бактерии од родот листерија. Може да предизвика спонтани абортуси, мртвороденче и предвремено породување.
Со преземање на проактивни чекори за спречување на пренатални инфекции, идните родители можат да се релаксираат и да уживаат во радостите на бременоста, знаејќи дека прават се што можат за да обезбедат здравје и благосостојбата на своето бебе.
Не дозволувајте стравот од овие инфекции да ве обземе бидејќи има многу чекори што секоја трудница може да ги преземе за да се заштити себеси и своето бебе. Прво и основно: тестирајте се за пренатални инфекции на почетокот на бременоста. Раната дијагноза и третман може да го намалат ризикот од болест и за мајката и за детето. Дополнително, практикувањето добра хигиена, како што е честото миење на рацете и избегнувањето близок контакт со болни луѓе, може многу да помогне во спречувањето на инфекцијата. Исто така, важно е да се избегнуваат ризични однесувања, како што е незаштитен секс или споделување производи за лична хигиена, за да ризикот од инфекција се сведе на минимум.
Грижата за целокупното здравје за време на бременоста, вклучувајќи здрава исхрана, доволно вежбање и избегнување стрес, исто така ќе помогне да се спречат инфекции. И конечно, отворената и искрена комуникација со лекарот е од суштинско значење за време на бременоста; разговарајте за какви било проблеми или симптоми кои може да се појават и одете на редовни прегледи.
