Не се работи за типична тема при лежерен разговор со кафе, но одговорите на прашањето како вагината навистина се менува по породувањето ги интересира сите бремени жени. Ова се неколку најважни факти токму за здравјето на вагината по породувањето и се што сте сакале да знаете на оваа тема, а не сте сакале да прашате.
- Можеби ќе искусите сувост
Без разлика како сте се чувствувавте по породувањето, падот на хормоните предизвикува сувост и чувствителност на вагината, што влијае на недостаток на сексуална желба и можна непријатност при сексуален однос. Може да поминат неколку недели додека не се вратите во нормала, особено ако доите.
- Доаѓа до слабеење на мускулите на карлицата
Мускулите на карлицата се многу важни за статиката и функцијата на гениталиите и мочниот меур, а за време на бременоста и по породувањето доаѓа до нивно слабеење. Колку овие мускули ослабуваат, зависи од неколку фактори, вклучувајќи ја големината на вашето бебе, должината на породувањето, па дури и вашите гени.
- Вагиналното пукање е една од најчестите последици на продувањето
Вагинална пукање е спонтано (што значи дека лекарот не направил рез), расцеп на перинеумот (областа помеѓу вагината и анусот) што се случува кога бебето излегува низ вагиналниот канал. Тоа спонтано пукање најчесто се случува кај прворотките, ако бебето е поголемо, ако породувањето е идуцирано или ако се работи за породување со вакуум.
- Болка во текот на мокрењето
Ако ви е тешко да уринирате по породувањето поради шиењето, обидете се тоа подрачје да го прскате со топла вода за да ја олесните болката, а потоа лесно тапкајте со газа за да го исушите тој дел. Пијте и доволно вода.
- Инконтиненција – табу тема по породувањето за која на жените им е непријатно да зборуваат
Вагиналното породување ја зголемува можноста за развивање на стресна уринарна инконтиненција, а почеста е кај жените кои родиле повеќе пати. До стресна инконтиненција најчесто доаѓа при кивање, кашлање, смеење и дигање товар, а најчесто исчезнува неколку недели по породувањето.
Друг вид е ургентна уринарна инконтиненција која вклучува силна и изненадна потреба за мокрење. И таа повеќе се развива при вагинално породување, а најважното е дека по повеќето случаи уринарната инконтиненција може да се лекува без лекови и операција, со Кегелови вежби кои ги зајакнуваат мускулите на карлицата.
- Потенцијален ризик од пролапс
Бременоста и вагиналното породување се најчестите причини за спуштање на карличните органи, особено ако се работи за комплицирана или повеќеплодна бременост, новороденче со поголема родилна тежина или долго траење на породувањето. Исто така, мајките кои веднаш по породувањето почнуваат со физичка работа, многу пешачат, се наведнуваат и се уморуваат – имаат поголема веројатност да доживеат непријатни симптоми на спуштена матка или други карлични органи.
- Сексуалните односи ќе бидат поинакви
Кога преживувате со четири часа сон дневно, идејата да правите нешто друго освен да спиете кога сте во кревет може да изгледа сосема туѓо. Меѓутоа, ако и кога сте подготвени за секс, имајте на ум дека некои работи најверојатно ќе бидат малку поинакви.
- Болка: Во повеќето случаи, болката што ја чувствувате при првите неколку сексуални односи по породувањето е сосема нормална и ќе помине. Бидете нежни еден со друг и наскоро работите ќе се вратат на старо, ако не и на подобро.
- Чувствителност и вагинална сувост: Вашиот природен лубрикант најверојатно нема да биде ист како порано, затоа со партнерот посегнете по вештачки и бидете креативни.
- Доењето може да има негативно влијание врз вашиот сексуален живот: Доењето ви помага да се поврзете со вашето бебе и да му обезбедите основни хранливи материи, но исто така може да доведе до сувост на вагината поради пониските нивоа на естроген. Ако не доите, влажноста на вагината треба да се врати во нормала за неколку недели
