На пазарите и во маркетите, со доаѓањето на пролетта, достапни ни се се повеќе намирници во различни бои и вкусови, кои со својот богат нутритивен состав, но и со антиоксидантните својства му помагаат на организмот да се детокисицира од наталожените токсичните материи, но претставува и вистински извор на здравје и енергија.
ЗЕЛЕНИ ПРОЛЕТНИ НУТРИТИВНИ БОМБИ
Доминација над пролетните бои, секако превзема зелениот зеленчук, кој е богат со хлорофил кој помага во обновување на црвените крвни зрнца и хемоглобинот. Има ниска калорична вредност, не содржи масти, а е богат со влакна и ензими кои се неопходни за добро и за квалитетно варење.
- ЗЕЛЕНА САЛАТА
Богата е со витамините А, Ц, Е, Б1, Б2, Б3, Б6, како и со минералите, фосфор, калциум, магнезиум, железо и бакар. Одлична е за детоксикација на организмот, воспоставува алкална рамнотежа, па влијае на позитивното расположние и дава енергија. Може да се воведе во исхраната на детето по седмиот месец, со почитување на оптималното растојание помеѓу воведувањето на две нови намирници од три дена.
- МЛАД КРОМИД
Младиот кромид содржи антиоксидант – кверцетин, кој делува како природен антихистаминик и на тој начин ги ублажува сезонските алергии. Многу е хранлив и богат со витамини и минерали кои помагаат во спречување на многубројни болести. За младиот кромид со право се вели дека е идеален пролетен зеленчук богат со витамините А, К и Ц, како и со минералите, фосфор, калциум и калиум. Високиот удел на каротеноиди го прави благодат за видот, но и за кожата. Во исхраната на бебето може да се исечка и постепено да се додава во оброците по осмиот месец.
- КОПРИВА
Неправедно запоставена во секојдневното мени, оваа билка изобилува со многу лековити својства. Важно е прво убаво да се свари на пареа за листовите да се ослободат од влакненцата кои се всушност иритатори. Копривата е одличен сојузник во борба против слабокрвноста, богата е со железо и со антиоксиданти. Ги олеснува симптомите на алергија, настинка… Чорбата од коприва е идеална за подобрување на крвната слика. Во исхраната на бебето може да се воведе по седмиот месец.
- СПАНАЌ
Препораките за воведување на спанаќот во детската исхрана е по осмиот месец. На почетокот најдобро е да се дава во комбинација со друг зеленчук, како морков или компир, и тоа максимум два пати во неделата. За да се неутрализира оксалната киселина која се наоѓа во спанаќот, најдобро е да се подготви со млеко.
