Вирусите се причинители на 30 до 40% од инфективните проливи во развиениот свет, што вирусните гастроентеритиси ги става на второ место на најчести болести. Патот на нивно пренесување главно е феко-орален (неизмиени раце и консумирање заразена храна и вода). Гастроентеритис може да предизвикаат многу видови на вируси, но некои од нив сепак преовладуваат.
Кај децата инфекциите најчесто се предизвикани од ротавирус, кој е главен виновник за дури 65% од тешките проливи. Ротавирусните инфекции најчесто се јавуваат во зима, во подрачјата со умерена клима, и тоа со најголема зачестеност од декември до април.
Децата може да го шират ротавирусот непосредно пред појавата на симптомите на болеста, за време на траење на болеста и уште седум дена по завршување на болеста.
Болеста типично се манифестира со кратка појава на благо покачена телесна температура, мачнини и повраќање, непосредно пред да се појави водлеста дијареа (многу ретка со примеси на слуз или крв). Тој пролив просечно трае од 1-4 дена, иако неговото траење кај аденовирусните инфекции може да се продолжи и на две недели. Кај постарите деца, повраќањето може да биде доминантен симптом на болеста.
Важно е да се разликува вирусен гастроентеритис од пролив предизвикан од други фактори. На вирусната етиологија може да се посомнева кога повраќањето е силно изразено, кога перидот на икубација е подолг од 14 часа и кога сите знаци на болеста се повлекуваат за околу три до четири дена.
Висока температура, грчеви во стомакот и појава на крв и слуз во столицата речиси секогаш се знак дека станува збор за инфекција од бактерии.
