Џеспер Џул, познат дански семеен терапевт и автор на бројни книги за родителството, целиот свој професионален живот го посветил на подигање на свеста за важноста на децата да им се покаже почит, разбирање и трпение. Но, во исто време, тој нагласувал дека родителите мора да се заштитат и себеси, што го направи неговиот пристап кон позитивното родителство единствен.
Во својата книга “Пет основи на семејниот живот„, Џул донесува совети кои се толку едноставни што секој родител може да ги примени. Она што треба да го направите не бара подароци, туку само неколку минути од вашето време, а може да има огромно влијание врз вашиот однос со вашето дете.
Џеспер Џул предлага непосредно пред роденденот на вашето дете, да одвоите момент да размислите за тоа како тоа го збогатило вашиот живот. Потоа споделете ги тие мисли со него.
„Кажете му на детето колку ви значело и во кои аспекти го променило вашиот живот. Кажете го тоа онака како што ви доаѓа од срце, без украсување или прилагодување. Родителите често велат дека ги сакаат своите деца, но конкретни зборови кои опишуваат како децата нè збогатуваат, оставаат подлабока трага. Можете да го правите ова за секој нивни роденден – и секоја година тие зборови ќе им значат се повеќе“, пишува Џул, нагласувајќи ја важноста да се зборува со природен тон, дури и со мали деца.
„Шестмесечното бебе можеби нема да разбере поединечни зборови, но ќе го почувствува тонот и благодарноста во вашиот глас. Вака децата уште од мали нозе учат што значи отворена и искрена комуникација“, додаде тој.
Овој принцип важи и за односите меѓу партнерите. Џул нагласува дека меѓусебното признавање и ценење се клучни за успешна врска.
“Денес луѓето остануваат во врски чисто поради емоционален избор. Ние го продолжуваме партнерството само ако другата личност не збогати и не прави среќни. Затоа е важно јасно да изразиме како се чувствуваме и колку ни значи другата личност”. заклучува тој.
