Кога имате бебе, сосема е очекувано тоа да се буди навечер за да јаде, без разлика дали го доите или се храни со шише. Меѓутоа, понекогаш децата престануваат да јадат ноќе, но сепак се будат, поради што мајките од замор и ненаспаност завршуваат во ситуација да „не знаат каде им е главата“.
Постојат многу причини зошто децата се будат во текот на ноќта, а често за време на тоа будење плачат и родителите тешко ги враќаат повторно да заспијат. Да речеме, децата чиј нервен систем е престимулиран или иритиран почесто се будат ноќе, но и оние кои се навикнати да го имаат вниманието на нивните родители по цел ден. Во овие случаи, проблемите со спиењето се предизвикани од зголемената чувствителност или неможноста да заспие самостојно.
Здравото дете инаку е многу љубопитно и живо, па честото ноќно будење може да биде предизвикано од тоа што малечкото не троши доволно енергија во текот на денот.
Освен тоа, во првите месеци од животот бебињата имаат поизразен плиток отколку длабок сон, па секое шушкање, вклучување светло или нешто слично може да ги разбуди. Кога се во прашање малку постарите деца, знајте дека на околу година и пол се појавуваат првите кошмари, а тоа може да биде и причина за будење.
Времетраењето и квалитетот на фазата на длабок сон се директно поврзани со состојбата на бебето, што значи дека никнувањето на заби или грчеви може да бидат причина за чести ноќни будења. Ако на детето не му никнуваат заби, добро јаде и е доволно физички активно во текот на денот, внимавајте дали околината му е пријатна за спиење – да не е премногу топло, да не е задушливо во собата, да не му се неудобни пижамите…
Што може да му помогне на детето да спие подобро?
- Создадете дневна рутина и држете се до неа.
- Ограничете ги активностите пред спиење, за да се смири нервниот систем на детето. По вечерата, обидете се да го забавувате детето со некои потивки активности, како читање книги.
- Погрижете се детето да се храни здраво, а особено ограничете го внесувањето на намирници навечер што може да бидат тешки за стомакот и да предизвикаат гасови или грчеви.
- Обидете се да го масирате вашето бебе после капење, на овој начин мускулите и нервниот систем ќе се релаксираат.
