Воспаленијата на ушите се релативно чести кај децата и речиси и да нема дете кое во одреден момент ги нема. Згора на тоа, според некои податоци, дури 60 отсто од децата на тригодишна возраст имаат барем една инфекција на увото, а околу 25 отсто имаат повеќе од три пати во тој период.
Кај некои деца, инфекциите на увото често се повторуваат, а еве што треба да знаете за тоа и дали тоа укажува на посериозен проблем.
Инфекции на увото и антибиотици
Она што треба да го знаете е дека инфекциите на увото може да се вратат дури и по третманот со антибиотици. Постојат многу вируси и бактерии кои можат да доведат до воспаление на средното уво, што значи дека кога детето ќе се опорави од една инфекција, може да „собере“ друг вирус или бактерија и повторно да се разболи.
Ако детето постојано има инфекции на увото во раното детство, ова обично не е причина за загриженост. Сепак, честите епизоди на воспаление на средното уво, може да доведат до одредени компликации, како што се:
- Пукање на тапанчето
- Привремено губење на слухот
- Тинитус или зуење во ушите
- Ширење на инфекцијата на други области на главата и вратот
Рекурентно воспаление на средно уво се смета кога детето ја има оваа инфекција три пати во шест месеци, односно четири инфекции во една година.
Зошто инфекциите на увото постојано се враќаат?
Родителите чии деца имаат чести инфекции на увото се прашуваат која е причината – всушност, постојат неколку.
Анатомија
Евстахиевата туба, каналот низ кој течноста од ушите ја носи до задниот дел на грлото, кај децата е пократка, потесна и поправа, па не може добро да ја извршува својата функција. Сè што може да влијае на оваа дренажа, како воспаление или настинка, го зголемува ризикот бактериите да се заглават во средното уво и да доведат до инфекција.
Уште некои анатомски проблеми кои можат да бидат причина за чести инфекции на увото се зголемени аденоиди или зголемен трет крајник, расцеп на непцето и некои генетски состојби како Тарнеров или Даунов синдром кои можат да влијаат на развојот на увото.
Изложеност на вируси и бактерии
Колку повеќе детето е изложено на вируси и бактерии, толку е поголема шансата да дојде до воспаление на увото.
Не пиење антибиотици до крај
Инфекциите на ушите предизвикани од бактерии најчесто се лекуваат со антибиотици, а кај децата кои земаат лекови честопати не поминуваат многу лесно. Доколку децата не ги испијат до крај препишаните антибиотици, инфекцијата нема целосно да помине, а тоа може да доведе до повторени инфекции.
Во други случаи, може да се случи да одреден антибиотик не делува на одреден тип на бактерии, па затоа е неопходна промена на лекот.
Генетика
Родителите кои имале чести инфекции на увото може да имаат и деца кои ќе бидат повеќе склони кон тоа. Во некои случаи, детето може генетски да има различна количина на добри бактерии во увото, што влијае на шансите за инфекции.
Важен фактор се и разликите во имунолошкиот систем, односно децата со послаб имунитет почесто имаат бактериски или вирусни инфекции, што може да доведе до инфекции на увото.
Обликот на внатрешното уво може да биде причина и за почестата појава на овие инфекции.
