Факт е дека децата се скептични за храната – од бојата, мирисот и вкусот, до самата конзистентност на одредено јадење. Понекогаш се чини дека оддалеку ја чувствуваат нашата нервоза и страв додека готвиме и се обидуваме да ги „излажеме“ да јадат храна што навистина не ја сакаат. Како да имаат вградени сензори за здрава храна и не сакаат ни да отворат уста кога нешто зелено ќе им се приближи до устата, а оптимистичките приказни за Попај кој јадел спанаќ и станал голем и силен, или песните што ги користиме за да им го одвлекуваме вниманието, глумејќи се дека сме авиони, камиони и слично, воопшто не помагаат.
Меѓутоа, една студија до некаде го расветли проблемот зошто дури и најиновативните тактики не помагаат да ги убедиме децата да јадат здрава храна.
- Не им кажувајте дека тоа е здрава храна
Според ова истражување, ако децата знаат дека тоа што им го нудиме е „добро за нив“, речиси сигурно нема да ја јадат таа храна! Зошто? Затоа што претпоставуваат дека нема добар вкус.
Професорката Ајелет Фишбах од Чикаго го истакнува следново:
“Се чини дека децата од предучилишна возраст мислат дека храната служи само за две цели – или да биде „добра за нив“ или да има добар вкус. Тие веруваат дека овие две работи не можат да одат заедно. Значи, ако им кажете дека морковите ќе ги направат да растат и ќе им дадат подобар вид, вие всушност ги обесхрабрувате да јадат моркови. Ако сакате да го натерате вашето дете да го изеде тој морков, треба едноставно да му го дадете и да молчите, или можеби да спомнете дека е вкусен и тоа е тоа“, советува Фисбах.
- Подобро да молчите или само да спомнете дека јадењето е „вкусно“
Истражувањето било спроведено на 270 деца од предучилишна возраст и вклучувало неколку експерименти. На децата им се читале приказни за едно мало девојче кое имало малку храна за ужина. Во некои приказни ја интересира храната затоа што храната е ‘добра за неа’, во некои затоа што е вкусна, додека во други не е објаснето зошто девојчето е заинтересирана за храна. Во секоја приказна каде што се спомнувало дека храната е вкусна или ништо не се објаснувало, децата јаделе повеќе храна, а каде се споменувало дека е здрава, децата не биле заинтересирани да јадат.
- Уживајте во храната, па вашите деца ќе имаат поголема веројатност да ја пробаат
Друг важен факт е дека децата од предучилишна возраст обично ги имитираат другите и сакаат да се угледаат на нив, а најмногу ги имитираат своите родители. Значи, бидете нивен пример. Ако ве видат како јадете нешто и уживате во тоа, има поголеми шанси и самите да сакаат да го пробаат. Но, не претерувајте, правејќи претерани звуци како „мммм“ и „ова е многу вкусно“ бидејќи ќе изгледа вештачко и ќе направите спектакл од вашиот оброк, што дефинитивно треба да го избегнувате.
Исто така, експертите тврдат дека е важно да се создаде рутина за децата, што значи да се служат оброците приближно во исто време и да се труди целото семејство да јаде во исто време, на иста маса. Ако тоа не е изводливо во текот на неделата, тогаш практиката на заедничко јадење дефинитивно треба да се фокусира на викендите. Така, оброците ќе му станат навика на детето и ќе јаде без премногу да прашува што е сервирано во чинијата.
Откако ќе заврши оброкот (без разлика дали се изело сè што е во чинијата или не), детето треба да се научи дека нема враќање назад и дека после тоа повеќе нема да се служи храна и дека нема ништо до следниот оброк. Ова исто така ќе го научи вашето дете дека е подобро да јаде што е можно повеќе за време на оброците.
Конечно, треба да се забележи дека децата се многу попаметни и полукави отколку што мислиме. Ако почнеме да приредуваме шоу и да нагласуваме како брокулата, кељот, блитвата и спанаќот се „многу здрави“ уште пред да се послужи храната, децата ќе го „намирисаат“ трикот и таа храна автоматски ќе им стане сомнителна и одбивна.
