Секогаш кога детето ќе се разболи, тоа е стрес за родителите и тие ја следат секоја промена во состојбата на детето, за да можат навреме да реагираат доколку ситуацијата се искомплицира.
Еден од симптомите кој кај децата најчесто се јавува е течење на носот, а родителите се особено загрижени кога ќе забележат дека секретот од носот ја менува бојата и станува жолт или зелен. Нивната прва мисла е обично дека вирусната инфекција преминала во бактериска, а педијатарката д-р Марија Телегина објаснува дали тоа навистина е точно.
„Во текот на зимската сезона, една од главните дијагнози кај децата е акутниот назофарингитис или едноставно течење на носот, кој најчесто се јавува поради вируси. Течење на носот кај акутните респираторни инфекции има свои фази на прогресија и созревање. Секретот во носот и отокот се нормална реакција на имуниот систем. Течниот секрет е потребен за чистење и испирање на вирусот и мртвите клетки на миклофлората која живее во носната слузокожа. По правило, секретот е течен во првите три до пет дена од инфекцијата, а потоа во игра влегуваат бактериска флора, леукоцити, лимфоцити, кои исто така помагаат во борбата против вирусот, поради што секретот добива боја меѓу четвртиот и седмиот ден од болеста“, објаснува таа.
Докторката истакнува дека родителите најчесто се загрижени кога ќе видат зелен исцедок од носот на своето дете, но дека тоа всушност не укажува на бактериска инфекција.
“Ова е многу честа заблуда. Всушност, зелениот секрет треба да ве радува бидејќи тоа значи дека болеста е при крај и дека детето наскоро ќе закрепне”, вели д-р Телегина.
Педијатарот објаснува дека зелената боја на секретот ја дава ензимот миелопероксидаза кој се наоѓа во леукоцитите. Зелениот секрет обично е и погуст, што го отежнува исфрлањето од носот, но сето тоа е природен тек од назофарингитисот. Докторката истакнува дека во овој случај не е потребно лекување со антибиотици и дека е доволно испирање на носот за да се спречи сушење на слузницата.
Доколку зелениот секрет од носот трае подолго од десет до 14 дена, развие остар, непријатен мирис, температурата на детето се зголемува, се појавуваат главоболки, здравјето се влошува или зелениот исцедок излегува само од едната ноздра, задолжително контактирајте го вашиот лекар бидејќи можеби е неопходна антибактериска терапија.
