Ова се одговорите на најчестите прашања и педијатарски совети за сите дилеми околу настинката кај децата:
- Што е всушност настинка?
Настинката е блага вирусна инфекција на горните дишни патишта – пред се носот и горниот дел од грлото. Станува збор за најчеста инфекција на дишните патишта!
- Зар не е студеното време, главната причина?
Не е ниту студеното време, ниту провевот, туку вирусите се причина за настинка и тука нема дилема. Вируси на настинка има многу, над 200 типови, а навистина почесто се појавува во студените денови. Сепак, настинка може да се случи било кога во текот на годината.
- Како се добива?
Лесно – со контакт со друго болно дете или возрасен заболен. Вирусите лесно и брзо се шират, со кивање, кашлање, но и со валкани раце. Детето го брише носот, не ги мие рацете, па се дружи и допира со здрави лица – и вирусот брзо се шири.
- Зошто така често се повторува кај дете кое оди во градинка?
Вирусите на настинката особено брзо и лесно се шират во колективите – градинка, училиште, но и на сите места каде се собираат голем број луѓе. Децата во градинките се најизложени, оти се уште немаат развиено имунитет против бројните вируси на настинката. Поради тоа, вирусите напаѓаат сериски, а размената на различните типови вируси може да траат и со месеци!
- Кога мора да се оди кај лекар?
Поради настинка не мора да се оди на лекар. Тоа е безопасна и блага вирусна инфекција на носот, кој треба редовно да се чисти и да се одржува прооден – тоа е се.
- Може ли да дојде до компликации?
Тие се исклучително ретки, бидејќи се работи за благи и минливи инфекции.
Главно се работи за продолжена затнатост на носот (поради нередовно испирање и одржување на негобвата проодност), а поради тоа може да се јави блокада на Евстахиевата туба која се наоѓа помеѓу носот и грлото. Последица е болка во увото (по таложење на секрет во средното уво), а ако носот не се отзатне, може да се појави и воспаление на средното уво (otitis media).
Кај постарите деца, исто така, многу ретко, може да се јави воспалние на синусите – синузитис. Повторно причината е предолго затнат нос, кој не се “сервисира“ како што треба.
- Како да се засили имунитетот против вирусите на настинката?
Кога се работи за обична настинка, значи за блага вирусна инфекција, нема потреба имунитетот посебно да се засилува. Доволно е детето здраво да се храни, да има редовна физичка активност и здрав сон.
Со тек на време (кое се мери во години), дететос амо ќе развие имунитет против бројните вируси на настинка, а тоа обично се случува на 6 до 7 години.
