Првите чекори на детето се еден од оние моменти што родителите ги паметат цел живот. Тоа е момент што го симболизира не само крајот на ползењето, туку и почетокот на нова ера на независност, откритија и уште поголеми авантури.
Но, кога точно треба детето да прооди? За некои, тоа е уште од осум месеци, додека други деца чекаат додека не наполнат две години. И иако разликите меѓу децата можат да ги загрижат родителите, една нова научна студија носи важно и смирувачко откритие: времето на првите чекори во голема мера е одредено од гените.
Научниците од Универзитетот во Сари и Есекс анализирале генетски податоци на повеќе од 70.000 бебиња и идентификувале 11 генетски маркери кои влијаат на тоа кога детето ќе го направи својот прв независен чекор. Нивното истражување беше објавено во престижното списание „Nature Human Behaviour“.
Професорката Анжелика Роналд, еден од водечките автори на истражувањето, објаснува: „Повеќето бебиња проодуваат помеѓу 8-миот и 24-тиот месец од животот, што е многу широк временски период. Тој момент носи голема симболика и за детето и за родителите. Тоа е знак дека влегуваат во нова фаза од животот“.
Дали децата кои порано проодуваат се понадарени?
Она што ова истражување го носи како пособено вредно е потврдата дека родителите не треба да паничат ако нивното дете „доцни“ во проодувањето, бидејќи во многу случаи тоа не е знак на проблем, туку едноставно природна варијација што доаѓа со генетската комбинација.
Д-р Ана Џуи, која исто така учествувала во истражувањето, истакнува: „Досега, не разбиравме зошто некои деца проодуваат порано, а други подоцна. Родителите често мислат дека некаде направиле грешка, дека нешто не направиле како што треба. Оваа студија покажува дека генетиката игра значајна улога.“
Исто така е интересно што гените што влијаат на одењето се делумно истите гени што влијаат на развојот на мозокот. Истражувачите откриле поврзаност помеѓу подоцнежното одење (но сè уште во рамките на нормалниот опсег) и одредени генетски особини поврзани со високото образование. Исто така, некои генетски особини поврзани со подоцнежно одење покажуваат помала веројатност за развој на АДХД.
Секако, ако родителите се загрижени за развојот на своето дете, секогаш е најдобро да побараат мислење од педијатар. Но, оваа студија носи важна порака: секое дете има свое темпо, и тоа е сосема во ред.
