Научен и медицински тим од Универзитетот во Њукасл идентификуваа ген кој би можел да објасни зошто некои луѓе, иако се заразени со коронавирус, не се разболуваат од КОВИД-19.
Генот со службено име HLA-DRB1*04:01 е пронајден три пати почесто кај луѓе кои немале симптоми на КОВИД-19, што сугерира дека тој обезбедува еден вид на заштита од самата болест.
Во студија објавена во часописот HLA, научниците споредувале асимптоматски пациенти со пациенти кои развиле тешка форма на КОВИД-19. Тие користеле секвенционирање на гени на ниво на HLA гени лоцирани на хромозомот 6.
Користеле примероци од 49 пациенти со тежок КОВИД-19, кои биле хоспитализирани и 69 асимптоматски пациенти кои имале позитивен тест на антитела. Проучувале различни верзии на генот HLA за да видат дали има некои разлики.
Откритието би можело да доведе до развој на генетски тестови кои би укажувале на тоа кој треба да биде во приоритетната група за вакцинирање во иднина
Откриле дека HLA-DRB1*04:01 е почест кај оние кои не покажувале симптоми на болеста, иако биле заразени. Тие исто така откриле дека генот е почест кај луѓето во Северна и Западна Европа, што може да сугерира дека луѓето во овие области ќе имаат помала веројатност да развијат тешка форма на КОВИД-19, но сепак ќе бидат подложни на негово ширење.
„Ова е многу важно откритие бидејќи може да објасни зошто некои луѓе едноставно не се разболуваат иако се заразени со коронавирус“, истакна во соопштението за печат д-р Карлос Екеварија, коавтор на студијата на Универзитетот во Њукасл.
Тој додаде дека ова би можело да доведе до развој на генетски тестови кои би можеле да укажат на тоа кој би требало да биде во приоритетната група за вакцинација во иднина.
Авторот на студијата Дејвид Ленгтон истакна дека откривањето на врската помеѓу географското потекло и зачестеноста на генот HLA е фасцинантно.
„Ова ја нагласува комплексната интеракција помеѓу животната средина, генетиката и болестите. Знаеме дека некои HLA гени реагираат на витамин Д и дека ниските нивоа на витамин Д се фактор на ризик за развој на тешки форми на КОВИД-19, така што во иднина ќе фокусираме на тој дел“, истакна Ленгтон.
Ова откритие може да им помогне на здравствените власти подобро да ја испланираат борбата против КОВИД-19 во иднина и да ги заштитат најранливите групи.
