Кога коронавирусот ги инфицира клетките, тој не само што ја ослабува нивната активност, туку може и да ја промени нивната функција, покажува новото откритие на американските научници.
На пример, кога бета клетките на панкреасот, кои произведуваат инсулин ќе се инфицираат со вирусот, тие не само што произведуваат многу помалку инсулин од вообичаеното, туку и почнуваат да произведуваат гликоза и ензими за варење, што не е нивна работа, откриле истражувачите.
„Тоа го нарекуваме промена во судбината на клетките“, вели д-р Шубинг Ченг, која ја предводеше студијата, и која го опиша откритието во презентацијата на виртуелниот годишен состанок на Европската асоцијација за проучување на дијабетес.
Не е јасно дали промените се долготрајни или би можеле да бидат реверзибилни, истакнаа научниците претходно во трудот објавен во часописот „Cell Metabolism“.
Д-р Чен забележала дека некои луѓе кои прележале Ковид-19 развиле дијабетес кратко време по инфекцијата.
„Секако, вреди да се испита стапката на луѓе кои страдаат од дијабетес во оваа пандемија на Ковид-19“, рече таа во соопштението.
Нејзиниот тим експериментирал со коронавирусот во групи на клетки, т.н. мини-органи или органоиди што личат на белите дробови, црниот дроб, цревата, срцето и нервниот систем.
Откритието укажува на тоа дека губењето на функцијата на клетките може да се случи и во ткивото на белите дробови, изјави д-р Чен од „Weill Cornell Medicine“ во Њујорк за „Ројтерс“.
