Не е изненадување што 48 проценти од децата помали од три години и понатаму ќе се будат во текот на ноќта, а со тој проблем доаѓа и хроничниот недостаток на сон и следниот ден уморно дете, но и родител.
Доколку и вие сте меѓу овие родители, ова се некои совети што ќе ви помогнат на вашето дето, но и вам да добиете повеќе сон.
Рано легнување во кревет
Дали знаете дека вашето дете е во најдлабок сон помеѓу 20:00 часот и полноќ? Ова значи дека ако детето си оди да легне по 20:00 часот, веројатно нема доволно да се наспие, поради што најверојатно ќе се разбуди во текот на ноќта. Ако имате проблем со будењето, обидете се да воведете порано време за легнување: околу 19 или 19:30 часот.
Не брзајте
Некои деца допрва ја учат умешноста на самоуспивање. Ако истрчате кај детето во соба веднаш штом ќе го слушнете првиот звук на негодување, детето може да се навикне да му треба родител за утеха, прегратка или нишање за повторно да заспие. Ова се нарекува „асоцијација за спиење“. Обидете се да почекате неколку минути пред да влезете во собата на детето. На овој начин му давате шанса на детето само да се смири и повторно да заспие. Ако негодувањето се претвори во плачење – тогаш обидете се со следниот чекор.
Понудете “ограничена“ помош
Ако детето не може само да се смести во кревет, помогнете му. Вашето дете ќе бара да го подигнете, гушнете или лулате секој пат кога ќе се разбуди ако е тоа она на што навикнало за повторно да заспие. Обидете се да го одвикнете од тоа на начин да му понудите “ограничена“ помош. На пример, погалете го детето така да знае дека сте тука за него и кога ќе се смири, но се уште е будно, излезете од собата. Тогаш, ако и понатаму плаче по вас, одложете го времето кога ќе се вратите назад во собата. Нежниот пристап кон “тренингот за самоуспивање“ ќе му помогне на детето да научи дека не му требате вие за повторно да заспие.
Исклучете болест или проблем со забите
Секако постојат моменти кога вашето дете плаче навечер бидејќи не му е добро или трпи болка од никнувањето заби. Тоа е време кога најмногу му требате. Пред да претпоставите дека на вашето дете му треба “тренинг за самозаспивање“, проверете дали е болно или е во прашање нов заб. Кога малите деца се болни или нешто ги боли, најмногу од се им е потребна ваша утеха.
Дајте му “утешител“ на детето
Ќебенце или перниче што може да го гушка, плишана играчка или некоја ваша маица што може да ја мириса – сето ова може да го утеши детето во текот на ноќта и да му помогне да се врати да спие. Ако овие работи станат приврзани за детето, ќе научи да ги користи како утеха и повторно само ќе заспие без секогаш да ве вика вас за помош.
Доследна рутина на спиење
Едноставната и доследна рутина за спиење има смирувачки ефект врз децата. Ова може да вклучува топла бања, а потоа приказна и/или песничка за добра ноќ. Ако секоја вечер ги повторувате истите работи, ќе го подготвите вашето дете за спиење. Кога детето ќе почне да ја прифаќа рутината, односно кога само ќе се смести и доброволно ќе заплови во сон, тогаш и ноќните будења ќе станат поретки, а кога ќе ги има – полесно ќе ги поднесете, и вие и детето.
Продолжете со попладневниот сон
Можеби мислите дека на вашето дете му треба помалку сон ако се буди во текот на ноќта оти можеби не е уморно, но всушност, факт е дека веројатно му треба повеќе сон. На децата на возраст од две, три и четири години им требаат во просек од 10 до 14 часа сон, што вклучува и дневен, односно попладневен сон. Ако вашето дете има навика да го прескокнува попладневното спиење, може да страда од прекумерен замор што ќе му го отежне ноќното спиење.
Именувајте ја промената
Ако вашето дете досега спиело цела ноќ без да се разбуди и одеднаш почне да се буди во текот на ноќта како новороденче, размислете дали нешто се променило во неговиот/нејзиниот свет. Нов брат или сестра, прилагодување во градинка, одвикнување од пелени или нешто друго – сето ова може да доведе до регресија. Ако идентификувате промена во животот на детето поради која се чувствува вознемирено, тогаш именувајте ја и обидете се да работите на нејзиното решение заедно со детето.
Бидете нежни, но цврсти
Ако влегувате во собата на детето за време на ноќните будења, бидете нежни, но цврсти. Бидете смирени и тивки за да ја нагласите идејата дека сега е време за спиење.
Повремено спротиставете се на заедничкото успивање
Нема ништо поубаво од тоа кога детето ќе заспие во вашата прегратка, но ако знаете дека вашето дете не може поинаку да заспие, тогаш треба да ги промените прегратките и галењето како нешто што го правите пред легнување во кревет, а не како нешто што го правите пред да заспиете. Запомнете, на овој начин не го лишувате детето од љубов и приврзаност, туку му помагате да научи дека може да заспие и без вас. Исто така, треба да се повтори дека добрата рутина за спиење му помага на детето да научи кога е време за спиење.
Помогнете му детето да го “обработи“ својот ден
Понекогаш малите деца се будат во текот на ноќта затоа што не можат да ги процесуираат работите. Поради тоа што премногу нешта им се “мотаат“ низ главата, децата се вртат и се будат и не можат да спијат. Корисна и добра работа што би можете да ја додадете во рутината за спиење е еден вид прераскажување на денот со детето додека се подготвувате за во кревет, односно додека облекувате пижами и ги миете забите. Ова ќе му помогне на детето да го обработи својот денот и да ги разбере искуствата што ги доживеало тој ден и да не ги мисли за помирно да заспие.
Земете ги предвид ноќните кошмари
Ако вашето дете се буди во текот на ноќта со врескање или силно замавнува со рацете, можеби воопшто не е будно, туку има кошмари. Вашето дете може да изгледа како да има кошмар и очите може да му се отворени, но тоа всушност се уште спие. Најдобар начин да се справите со овие ноќни стравови е да не го будите детето и да оставите да помине. Ако го разбудите детето, тоа ќе биде уште повеќе вознемирено, збунето и ќе се мачи повторно да заспие.
Оставете го детето да ја “потроши“ енергијата во текот на денот
Децата треба физички да се “издуваат“ во текот на денот така што ќе се истрчаат или физички се активни додека си играат. Ако вашето дете го поминало денот седејќи во количка или општо во затворен простор каде што не се движело многу – поголема е веројатноста да се буди во текот на ноќта бидејќи не ја потрошило целата своја енергија во текот на денот.
Исфрлете го давањето млеко на детето во текот на ноќта
Ако вашето бебе има навика да пие млеко од шише или да бара од вас да го доите, веројатно тоа ќе го поврзе со спиењето. На тој начин детето мисли дека му треба млеко за повторно да заспие. Обидете се да го одвикнете од ноќно хранење и дајте му шанса на детето само да заспие. Се разбира, детето може веднаш да не го прифати одвикнување и ќе ви требаат неколку ноќи додека детето да се прилагоди.
Посетете лекар
Ако ниту една од овие работи не функционира, разговарајте со вашиот лекар. Тој ќе провери дали постојат некои други причини поради кои вашето дете се буди во текот на ноќта. Меѓутоа, во повеќето случаи, проблемот, со текот на времето, ќе се реши сам по себе. Држете се!
