Речиси сите родители се лишени од сон во првата година од животот на нивното дете. Тоа е сосема нормално, особено во првите месеци кога бебето често се буди навечер, но понекогаш се чини дека ова неспиење трае долго, дури и по првата година, а родителите велат дека детето лошо спие и е такво од самото раѓање.
Меѓутоа, неврологот д-р Артур Уљаков тврди дека проблемите со спиењето кај децата често се јавуваат поради некои грешки кои родителите ги прават несвесно, од незнаење. Еве кои грешки се во прашање и како да ги поправите.
Грешка 1
Тие ја затемнуваат просторијата во текот на денот, а навечер ја држат вклучена лампата. Родителите често во текот на денот, додека детето спие, ги навлекуваат завесите и ја затемнуваат просторијата, за да може детето подобро да спие. Ноќе, пак, ја оставаат светилката вклучена за детето да не се плаши. Меѓутоа, на овој начин се попрчеува производството на мелатонин, хормон потребен за спиење, кој подобро се синтетизира во темница, вели д-р Уљаков.
Како да ја поправите грешката: Постепено учете го детето да спие во темница навечер, а во текот на денот оставете малку светлина во собата. Така ќе се создадат услови да мелатонинот не се произведува премногу во текот на денот, туку повеќе во текот на ноќта, а детето постепено ќе почне да спие подобро.
Грешка 2
Родителите во текот на денот седат со бебето додека не заспие и му приоѓаат штом ќе шушне или се помрдне. Природно е родителите да бидат загрижени, но сепак би било добра идеја да се воздржите од приближување до бебето во секундата кога ќе се помрдне додека спие. Работата е, вели неврологот, дека ако детето се навикне постојано да има некого до него додека заспива, а навечер кога мама и тато спијат, сепак не му приоѓаат „секоја секунда“, тоа не може да заспие без нив и често се буди.
Како да ја поправите грешката: Обидете се да не му приоѓате на вашето дете при секое движење што го прави додека спие, бидејќи тоа ќе очекува од вас да го правите и навечер. Секако, не треба да оставите детето да плаче неутешно, туку дајте му шанса да се обиде самостојно да се смири и да заспие, а ако видите дека не може, дури тогаш пријдете му.
Грешка 3
Родителите мислат дека на детето му е доволен пократок ноќен сон.
“На консултации, родителите често велат дека нивното дете е баш такво, дека малку спие навечер. Потоа почнуваме да зборуваме за нивната дневна рутина и излегува дека мајката го заспива детето преку ден, а таа ги завршува домашните работи. За тоа време, детето се наспива колку што му е потребно и потоа долго нема да заспие вечерта“, вели неврологот.
Објаснувајќи со пример, д-р Уљаков потсетува дека на шестмесечно бебе му требаат околу 13-16 часа сон во текот на денот. Тоа значи дека ако спие десет часа во текот на денот (секако не сите одеднаш), ќе му бидат доволни меѓу три и шест часа навечер.
Како да ја поправите грешката: Ограничете го времето кое вашето дете го спие во текот на денот и обидете се да создадете дневна рутина, што значи дека вашето дете оди во кревет и се буди секој ден во исто време. “Почнувајќи од вториот или третиот месец од животот, препорачливо е постепено да се воведува минимална дневна рутина, која подоцна ќе се промени. Не заборавајте дека спиењето значително се менува во првата година од животот, па едномесечно бебе спие помеѓу 20 и 22 часа дневно, а веќе околу третиот месец тоа се намалува на 18 часа. Колку е детето постаро, помалку сон му треба, па дете од една година спие помеѓу 11 и 14 часа дневно“, порачува докторот.
