Детскиот мозок се развива со голема брзина и во таа смисла е многу моќен, но постојат и некои работи кои детето едноставно не може да ги совлада уште на рана возраст. Не знаејќи дека мозокот на детето едноставно не е доволно зрел за некои работи, родителите понекогаш го караат детето затоа што не може да направи нешто или го сметаат за непослушно.
„Мозокот е целосно развиен дури околу 25-годишна возраст“, вели педијатарот д-р Дина Марголин. „Кај малите деца тој е во процес на развој, па поради тоа, некои вештини кои на возрасните им изгледаат сосема природни се „недостапни“ за детето“.
Во продолжение дознајте кои пет работи не може да ги направи детскиот мозок.
- Да ги задржи и контролира емоциите
Главниот начин на кој децата ги изразуваат своите емоции е плачењето, особено кога се мали и не умеат да зборуваат или не можат доволно добро да зборуваат. Исто така, нивниот мозок сè уште не ја развил способноста за саморегулација, па детето не може да ја одложи или да ја потисне потребата за плачење, токму овде и сега.
- Да го разбере концептот на време
Ако на мало дете му кажете дека „ќе правите колачиња попладне“, очекувајте веднаш да го побара тоа затоа што не го разбира концептот на време, ниту дека нешто не може да прави сега.
Исто така, ако детето не се однесувало добро во текот на денот, па родителите го казнуваат со тоа што не му дозволуваат да гледа цртани пред спиење, тоа нема да разбере ниту да се сети зошто е казнето. Во неговиот свет утрото било одамна и веќе го заборавило.
- Да ги контролира своите желби
Ако детето сака да скока на креветот, тоа и ќе го направи. Мозокот на децата сè уште не е доволно зрел за да ги контролира импулсите и желбите, па затоа родителите и не треба да ја „запираат“ желбата на нивните деца да направат нешто, туку да ги насочат како сакаат да се однесуваат.
- Да размислува рационално
Веројатно секој родител се сретнал (или му претстои) фаза во која детето се жали на сè – боичката е „премногу сина“, јаболкото не е излупено како што замислило… Детето не умее да објасни што е тука погрешно, но тоа вистински е незадоволно од нешто, тоа се негови вистински чувства, без разлика што на возрасните им изгледаат смешно или претерано.
- Да изрази емоции со зборови
Децата немаат доволно развиен вокабулар за да го изразат сето она што го чувствуваат. Наместо тоа, додека нивниот мозок не е доволно зрел за да ги изрази своите чувства со зборови, тие ќе прават сцени, ќе беснеат, ќе плачат, кога се лути или сакаат нешто да се промени.
Препознавањето и искажувањето емоции е научена вештина и додека најмалите не ја совладаат, на родителите им треба многу трпение.
