Познавате ли и вие некое дете, на пријатели, роднини или на соседи кое никогаш не е болно? Знаат ли неговите родители нешто што вие не го знаете? Веројатно не, велат стручњаците, но овие пет навики на здравите деца може да бидат корисни за избегнување на различни болести:
Секогаш чисти раце
Редовното миење на рацете во огромен процент го намалува бројот на респираторни и болести на дигестивниот систем, така што навиката на редовно миење на рацете со употреба на сапун е многу важна пред секој оброк, но и при влез и излез од различни простории. Ако вашето дете не сака да мие раце, изберете песна што детето ја сака, па нека ги мие рацете додека не ја испее до крај. Целиот процес би требало да трае најмалку од 15 до 20 секунди.
Бидете активни секој ден
Истражувањата покажуваат дека редовната и умерена физичка активност може да го намали бројот на настинки и грип дури за 25 до 50 проценти. Веројатно поради тоа што ја зајакнува циркулацијата и клетките се борат против инфекциите.
“Физичката активност е подобра од било кој лек или чудо што се рекламира“, објаснува Харли Ротбарт, советник за родители.
Сонот е важен
Погрижете се детето рано да легнува да спие. “Недостатокот на сон двојно го зголемува ризикот од настинки или грип“, појаснува д-р Ротбарт. Помалите деца дневно треба да спијат околу 14 часа, додека на оние од предучилишна возраст им е потребен сон од 11 до 13 часа.
Избегнување на допирање на лицето
Вирусите и грипот влегуваат во телото низ носот, ушите и устата, така што вашето дете треба да ги држи рацете подалеку од овие делови од телото. Да, секако дека ова е тешко да се постигне, па затоа миењето на рацете е стратегија која е многу важна. Учете го вашето детет никогаш да не дели сламка за пиење, чаша или четка за заби.
Балансирана и здрава исхрана
Оброци со многу овошје и зеленчук во сите бои ќе помогнат при зајакнување на имуниот систем на детето. Побарајте намирници богати во витамин Ц (брокула, портокал, пиперка) и витамин Д (туна, млеко и житарки). Јогурт со активни култури (пробиотици), исто така може да помогне во градењето на одбранбениот механизам на детскиот организам.
