Бебињата се прекрасни мали суштетства на кои им треба целосно внимание и грижа, но некои појави понекогаш ги загрижуваат новите родители, иако се сосема вообичаени.
- СЕ ГРЧАМ
Да, навистина тоа може да изгледа необично, но нема место за загриженост. Мајките почнуваат да паничарат кога нивното бебе ќе направи нагло движење, ќе преврти со очите или во текот на спиењето се грзи (прави нагло опуштање на дел од телото). Сите тие се последица на незрелост на нервниот систем и обично се губат до шестиот месец од животот. Секако, тоа не значи дека развојот на нервниот систем е завршен, туку дека бебето почнува да прави сакани движења наместо рефлексни.
- МОЈОТ ВНАТРЕШЕН ТЕРМОМЕТАР НЕ Е ОСОБЕНО ЕФИКАСЕН
Новороденчињата не можат да ја регулираат температурата на своето тело, бидејќи нивната терморегулација се уште не функционира како што треба. Во првите месец-два треба да водите сметка за тоа дали на бебето му е жешко или му е студено и во склад со тоа преземате одредени мерки. За среќа, телото на новороденото бебе има околу 15 проценти масно ткиво, така што тоа на некој начин е заштитено од губење на топлина.
- МНОГУ СУМ ЧУВСТВИТЕЛНО НА ГУБЕЊЕ НА ТЕЧНОСТИ И МНОГУ ЛЕСНО МОЖЕ ДА ДЕХИДРИРАМ
Телото на возрасен човек се состои од 52 до 65 проценти вода, додека тој процент кај бебињата е зачајно повисок од 75 до 85 проценти. Но, покрај тоа што бебешкиот организам содржи висок процент на вода, бебињата многу побрзо може да дехидрираат од возрасните. Зошто? Бидејќи процесот на размена на материите (метаболизам) во нивниот организам е дури четири пати побрз отколку кај возрасен и тие многу побрзо дишат.
- ДОБЛИЖИ СЕ, СЕ УШТЕ НЕ МОЖАМ ДА ГЛЕДАМ ДАЛЕКУ
Тие на почетокот не гледаат подалеку од вашето лице и тоа кога ќе им се доближите многу близу. Со тек на време, очните јаболкници на бебето ќе се наместат како што треба, рожницата ќе созрее, па и нивното видно поле ќе се рашири.
- ИКАМ, НО НИШТО НЕ МЕ БОЛИ
Повеќето бебиња почнуваат да икаат додека се уште се во утробата на нивната мајка. Ова се јавува како резултат на спазам на дијафрагмата која на тој начин почнува да ги „подготвува“ малите бели дробови за дишење. Честите икања продолжуваат уште неколку месеци по раѓањето, бидејќи дијафрагмата сè уште не е во состојба целосно да го контролира протокот на воздух. Не грижете се, икањето не е непријатен феномен за бебето, туку го ослободува од вишокот воздух.
- УШИТЕ МИ СЕ МАЛКУ ПРЕКЛОПЕНИ
Ова е особено чувствително прашање за мајките. Меките и еластични уши на бебето се преклопени и сите се плашат дека нивното бебе ќе остане клемпаво. Некои мајки на бебиња дури им ставаат и капа, иако надвор е 40 под сенка, само за да избегнат „катастрофа“. Нема причина за паника, бидејќи по неколку недели ушите на бебето ќе станат поцврсти и ќе се наместат на вистинското место.
- НА МОЈАТА ГЛАВА СЕ НАОЃААТ НЕКОИ “ДУПКИ“
Секое новородено бебе има фонтанела на главата – место каде што коските на черепот сè уште не се споени. Природата не дозволува овие коски да се спојат за да за време на породувањето главата на бебето може безбедно, без оштетување, да помине низ родилниот канал. Неколку месеци по раѓањето, тие почнуваат да се спојуваат, за овој процес да се заврши околу првиот роденден.
