Бременоста е време на промени – не само емотивни и хормонални, туку и здравствени. За жените со астма, ова може да биде дополнителен предизвик. Иако е честа појава во општата популација, астмата кај трудниците бара особено внимание и редовна контрола.
Неконтролираната астма во бременоста може да доведе до намален проток на кислород до бебето, што го зголемува ризикот од ниска родилна тежина, забавен раст и предвремено породување. Кај мајката пак, тоа може да предизвика компликации како прееклампсија, проблеми со плацентата и зголемен крвен притисок.
Важно е да се знае дека секоја бременост е различна. Кај околу една третина од трудниците со астма симптомите се подобруваат, кај друга третина остануваат исти, а кај останатите се влошуваат. Затоа е клучно астмата да се држи под контрола со редовни прегледи – препораката е барем еднаш месечно да се посетува лекарот.
Најчести симптоми на астма кај трудници:
-
Кашлање, особено навечер
-
Отежнато дишење
-
Губење здив
-
Болка или притисок во градите
-
Свирење во градите при дишење
Симптомите варираат – некои жени имаат само еден, а други – комбинација од неколку. Без разлика, секој од нив треба да се сфати сериозно.
Кога мора да посетите лекар:
Пулмоалерголозите советуваат да се обратите на специјалист ако:
-
Имате повеќе од два бронхитиса во една година
-
Настинките траат подолго од вообичаено и се проследени со свирење или стегање во градите
-
Кашлицата трае повеќе од 8 недели
Лекарот најпрво ќе ја разгледа вашата лична и семејна историја, симптомите, и ќе предложи тестирања – како што се тестови за дишење, алергиски тестови, анализа на крв и рендген на градите. Доколку постои сомнеж за астма, ќе се направат дополнителни испитувања за потврда или исклучување на дијагнозата.
Контролата на астмата не е само за ваше добро – таа директно влијае и на здравјето на вашето бебе. Не ги игнорирајте симптомите и следете ја вашата состојба за да обезбедите здрава и безбедна бременост.
